Namangan viloyati IIB rahbariyati tomonidan profilaktika inspektorlari va saf boʻlinmalari xodimlari uchun navbatdagi oʻquv mashgʻuloti oʻtkazildi
2026-07-14 12:35:00 / Yangiliklar
Ichki ishlar organlari xodimlarini zamonaviy talablar asosida professional kadr sifatida tayyorlash, ularning xizmat va jangovar shayligini mustahkamlash, nazariy bilim hamda amaliy koʻnikmalarini yuksaltirish maqsadida tizimli ravishda oʻquv va sport mashgʻulotlari tashkil etib kelinmoqda.
Shu maqsadda Namangan viloyati IIB boshligʻi rahbarligida Jamoat tartibini saqlash boshqarmasi binosida navbatdagi oʻquv mashgʻuloti oʻtkazildi. Unda IIV SHXBB Namangan viloyati boʻyicha boshqarmasi boshligʻi va uning oʻrinbosarlari, sohaviy xizmatlar rahbarlari, shahar va tuman IIB profilaktika inspektorlari, patrul-post hamda yoʻl-patrul xizmati xodimlari ishtirok etdi.
Mashgʻulot davomida xodimlarga xizmat faoliyatida qonuniylik va xizmat intizomiga qatʼiy rioya etish, fuqarolar bilan muomala madaniyati, amaldagi qonunlar hamda qonunosti normativ-huquqiy hujjatlar talablarini toʻliq va bir xilda qoʻllash yuzasidan batafsil tushuntirishlar berildi.
Shuningdek, xizmat jarayonida rasmiylashtiriladigan protsessual hujjatlarni qonunchilik talablariga muvofiq yuritish, ularni rasmiylashtirishda yoʻl qoʻyilishi mumkin boʻlgan kamchiliklarning oldini olish, huquqni qoʻllash amaliyotida yagona yondashuvni taʼminlash masalalari yuzasidan tavsiya va koʻrsatmalar berildi.
Oʻquv mashgʻulotining amaliy qismida maxsus tayyorlangan oʻquv filmi namoyish etilib, unda xizmat faoliyatida uchrashi mumkin boʻlgan turli vaziyatlarda xodimlarning qonuniy va toʻgʻri harakat qilish tartibi, protsessual harakatlarni amalga oshirish ketma-ketligi hamda amaliy tajribalar atroflicha yoritildi.
Namangan viloyati IIB Axborot xizmati