IIV Akademiyasi rahbariyati tomonidan poytaxtimizning Mirobod tumanidagi mahallalarda xavfsiz muhitni shakllantirish boʻyicha amalga oshirilayotgan ishlar oʻrganildi
2026-07-12 12:20:00 / Yangiliklar
Oʻrganishlar davomida masʼul rahbarlar, faollar hamda hududlarga biriktirilgan magistratura tinglovchilari bilan birgalikda dolzarb vazifalar ijrosi muhokama qilindi.
“Oltinkoʻl” mahallasida 1365 ta xonadon boʻlib, ularda 6 mingga yaqin aholi istiqomat qiladi. Kriminogen vaziyatga salbiy taʼsir koʻrsatayotgan omillarni bartaraf etish maqsadida joylarga kamera va tashvish tugmalari oʻrnatilib, xavfsizlik tizimlariga integratsiya qilingan. Alohida toifadagi, muqaddam sudlangan va jinoyat sodir etish xavfi yuqori boʻlgan shaxslar roʻyxati shakllantirilib, manzilli profilaktik chora-tadbirlar belgilangan.
Muloqot chogʻida koʻp qayd etilayotgan jinoyatlar, ularning asl omillari, “102” tizimi orqali kelib tushayotgan murojaatlar, ijtimoiy profilaktika doirasida amalga oshirilayotgan ishlar, yoshlar va ayollar bandligi hamda boshqa dolzarb masalalar yuzasidan fikr almashildi. Xavfsiz muhitni taʼminlashga qaratilgan ishlarni jadallashtirish borasida tegishli vazifalar belgilab olindi.
Shundan soʻng akademiya boshligʻi “Istiqlolobod” mahallasini oʻrgandi. Kriminogen vaziyatni barqarorlashtirish boʻyicha taqdimot bilan tanishib, jamoat xavfsizligini taʼminlash va huquqbuzarliklarning barvaqt oldini olish yuzasidan oʻz takliflarini bildirdi.
Jinoyatlarning asosan tungi vaqtlarda sodir etilayotganini inobatga olib patrullik guruhlari faoliyatini kuchaytirish, fuqarolarning huquqiy madaniyati va ogohligini oshirish, kameralashtirish qamrovini kengaytirish, kriminogen vaziyati ogʻir joylarga qoʻshimcha kuch-vositalarni yoʻnaltirish, aholi muammolari va murojaatlarini oʻz vaqtida hal qilish zarurligi qayd etildi.
Oʻrganishlar davomida masʼullar va “mahalla yettiligi” vakillarining fikr-mulohazalari tinglandi. Yechimini kutayotgan har bir masala boʻyicha aniq mexanizm va chora-tadbirlar belgilandi.
IIV Akademiyasi Axborot xizmati