O‘zbеkiston Rеspublikаsi Ichki ishlаr vаzirligi

Oʻzbekiston Respublikasi ichki ishlar vazirining birinchi oʻrinbosari – Jamoat xavfsizligi departamenti boshligʻi general mayor Rustam Djurayev raisligida videoselektor shaklida idoralararo tezkor yigʻilish boʻlib oʻtdi.

Unda Milliy gvardiya qoʻmondonining birinchi oʻrinbosari polkovnik Sherzod Ibragimov, Favqulodda vaziyatlar vazirining birinchi oʻrinbosari polkovnik Sanjar Zuparov hamda hududiy boʻlinmalarning masʼul rahbar ishtirok etdi.

Yigʻilish kun tartibiga yozgi mavsumda fuqarolar xavfsizligini taʼminlashga oid uchta asosiy masala kiritildi.

Kun tartibidagi birinchi masala yuzasidan yigʻilish ishtirokchilari tomonidan oliy taʼlim muassasalariga kirish imtihonlarini oʻtkazish jarayonida jamoat tartibini saqlash va yoʻl harakati xavfsizligini taʼminlash choralari koʻrib chiqildi.

Taʼkidlanganidek, test sinovlari 14-iyul kunidan boshlanadi (Toshkent viloyati va Fargʻona viloyati Soʻx tumanida — 17-iyul kunidan) hamda ikki bosqichda oʻtkaziladi. Unda jami 660 ming nafardan ortiq abituriyent ishtirok etadi.

Huquq-tartibotni taʼminlashga ichki ishlar organlari, Milliy gvardiya va Favqulodda vaziyatlar vazirligi shaxsiy tarkibi jalb etiladi.

Barcha obyektlarda ramkali va qoʻlda ishlatiladigan metallodetektorlardan foydalangan holda nazorat punktlari tashkil etiladi, shuningdek, videokuzatuv tizimi orqali nazorat taʼminlanadi.

Imtihon oʻtkaziladigan hududlar yaqinida transport harakatiga vaqtinchalik cheklovlar joriy etilishi haqidagi maʼlumotlar ommaviy axborot vositalari va ijtimoiy tarmoqlar orqali aholiga oldindan yetkazib boriladi.

Kun tartibidagi ikkinchi masala doirasida issiq ob-havo sharoitida dam olish joylari, sogʻlomlashtirish oromgohlari va suv havzalarida xavfsizlikni taʼminlash choralari muhokama qilindi.

Yigʻilishda dam olish joylari va 181 ta sogʻlomlashtirish oromgohlarida dam olayotgan bolalar xavfsizligini taʼminlash masalasiga alohida eʼtibor qaratildi.

Shuningdek, suv havzalarida sodir boʻlayotgan baxtsiz hodisalarning asosiy sabablari ruxsat etilmagan joylarda choʻmilish va bolalar ustidan yetarli nazorat oʻrnatilmagani ekani qayd etildi. Shu munosabat bilan profilaktik tadbirlarni kuchaytirish va xavfli suv obyektlarini qayta oʻrganish boʻyicha vazifalar belgilandi.

Hududiy boʻlinmalar rahbarlariga bolalarning oromgohlarda boʻlish sharoitlarini, jumladan, ularni ichimlik suvi bilan taʼminlash, yongʻin xavfsizligi talablariga rioya etilishini hamda kunning eng issiq vaqtlarida ommaviy tadbirlarni cheklash choralarini qatʼiy nazorat qilish vazifasi yuklatildi.

Kun tartibidagi uchinchi masala doirasida bozorlar va yirik savdo obyektlarida yongʻin xavfsizligini taʼminlash boʻyicha vazifalar belgilab olindi.

Asosiy eʼtibor huquqbuzarlik va jinoyatlarning oldini olishga qaratildi. Muhokamalar yakuni boʻyicha masʼullarga bozorlarda xizmatni tashkil etish holatini chuqur tahlil qilish, zarur hollarda patrullik yoʻnalishlari va postlarni tezkor ravishda qayta koʻrib chiqish, shuningdek, savdo majmualari maʼmuriyatlari bilan hamkorlikni kuchaytirish vazifalar belgilab berildi.

IIV JXD Axborot xizmati