IIV rahbariyati tomonidan Surxondaryo viloyatida “Xavfsiz va sogʻlom yurt” tadbirlari doirasida amalga oshirilgan ishlar oʻrganildi
2026-07-10 15:20:00 / Yangiliklar
Oʻzbekiston Respublikasi Ichki ishlar vazirining oʻrinbosari, polkovnik Ramazon Ashropov rahbarligidagi ishchi guruh Surxondaryo viloyatida “Xavfsiz va sogʻlom yurt” keng qamrovli tezkor-profilaktik tadbirlari doirasida amalga oshirilayotgan ishlar bilan tanishdi.
Surxondaryo viloyati Ichki ishlar boshqarmasida oʻtkazilgan yigʻilishda mazkur tadbir doirasida jamoat tartibini saqlash, huquqbuzarliklar va jinoyatlarning oldini olish, kriminogen vaziyatni barqarorlashtirish, fuqarolarning hayoti, sogʻligʻi va mol-mulki daxlsizligini taʼminlash, profilaktik chora-tadbirlar samaradorligini oshirish hamda sohaviy xizmatlar oʻrtasidagi hamkorlikni yanada mustahkamlash masalalari muhokama qilindi.
Shuningdek, hududlarda huquqbuzarliklarning barvaqt oldini olish, aholi bilan manzilli ishlash, profilaktik tadbirlarni sifatli tashkil etish va mavjud kuch hamda vositalardan samarali foydalanish boʻyicha ustuvor vazifalar belgilab olindi.
Tashrif davomida Ichki ishlar vazirining oʻrinbosari Termiz shahar ichki ishlar boshqarmasida tashkil etilgan “Xavfsiz va sogʻlom yurt” tezkor shtabi faoliyati bilan ham tanishdi.
Oʻrganishlar jarayonida shtab ishini tashkil etish, jalb etilgan boʻlinmalar faoliyatini muvofiqlashtirish, davlat organlari bilan hamkorlikni yoʻlga qoʻyish hamda amalga oshirilayotgan tadbirlar ijrosini nazorat qilish masalalariga alohida eʼtibor qaratildi.
Yigʻilish yakunida barcha hududiy va sohaviy xizmatlar rahbarlariga belgilangan vazifalarni oʻz vaqtida, toʻliq va sifatli bajarish, xizmat intizomi hamda shaxsiy masʼuliyatni yanada kuchaytirish yuzasidan aniq koʻrsatmalar berildi.
IIV huzuridagi Tergov departamenti