“Xavfsiz va sogʻlom yurt” tezkor profilaktika tadbirlari doirasida 389 ta holatda oʻtkir tigʻli jismlarni olib yurish faktlari aniqlanib, tegishli tartibda chora koʻrildi
2026-07-10 07:55:00 / Yangiliklar
Toshkent viloyatida oʻtkazilayotgan “Xavfsiz va sogʻlom yurt” tezkor-profilaktik tadbiri doirasida oʻtgan 8 kun mobaynida viloyat IIBB va uning quyi tizimlari tomonidan “Tigʻ” maxsus profilaktik tadbirlari izchillik bilan oʻtkazildi.
Tadbir davomida koʻcha va jamoat joylari, shuningdek boshqa hududlarda oʻtkir tigʻli ashyolarni noqonuniy ravishda olib yurgan 389 nafar shaxs aniqlandi. Ulardan umumiy hisobda 395 dona oʻtkir tigʻli ashyo (sovuq qurol) aniqlanib, belgilangan tartibda rasmiylashtirilib olindi.
Aniqlangan ashyolardan 307 tasi pichoq, 66 tasi kastet 8 tasi bita boʻlsa, qolgan 14 tasi boshqa koʻrinishdagi tigʻli jismlarni tashkil qilgan. Ushbu tadbir natijasida oʻzgalarga tan jarohati yetkazishi mumkin boʻlgan qator jinoyat yoki huquqbuzarliklarning oldi olindi.
Maʼlumot uchun: Qonunga xilof ravishda sovuq qurol yoki sovuq qurol sifatida foydalanilishi mumkin boʻlgan ashyolarni olib yurish bazaviy hisoblash miqdorining 1 dan 5 baravarigacha boʻlgan miqdorda jarima solinishiga sabab boʻlishi mumkin. Shuningdek, boshqa qonuniy taʼsir choralari ham qoʻllanilishi belgilangan.
Tezkor profilaktik tadbirlar Toshkent viloyati boʻylab davom ettirilmoqda.
Toshkent viloyati IIBB Axborot xizmati