O‘zbеkiston Rеspublikаsi Ichki ishlаr vаzirligi

Mamlakatimizda jamoat xavfsizligini taʼminlash, huquqbuzarliklarning oldini olish hamda aholi osoyishtaligini mustahkamlashga qaratilgan “Xavfsiz va sogʻlom yurt” keng qamrovli profilaktik tadbirlari izchil amalga oshirilmoqda.

Shu munosabat bilan Oʻzbekiston Respublikasi Ichki ishlar vaziri oʻrinbosari, general-mayor Mirzaraximov Baxodir Yuldoshevich rahbarligida Ichki ishlar vazirligi Transport va turizm obyektlarida xavfsizlikni taʼminlash departamenti masʼul rahbar va xodimlari ishtirokida xizmat yigʻini oʻtkazildi.

Yigʻilishda transport infratuzilmasi va turizm obyektlarida jamoat tartibini taʼminlash, huquqbuzarlik va jinoyatlarning barvaqt oldini olish, fuqarolar hamda xorijiy sayyohlar xavfsizligini taʼminlash borasida amalga oshirilayotgan ishlar tahlil qilinib, mavjud kamchiliklar yuzasidan aniq chora-tadbirlar belgilab berildi.

Shuningdek, xizmat intizomini yanada mustahkamlash, profilaktik ishlar samaradorligini oshirish, zamonaviy axborot texnologiyalari va texnik vositalardan samarali foydalanish, temir yoʻl vokzallari, aeroportlar, metro bekatlari hamda turizm obyektlarida jamoat xavfsizligini taʼminlash boʻyicha masʼul xodimlarga ustuvor vazifalar yuklatildi.

General-mayor Mirzaraximov Baxodir Yuldoshevich tomonidan har bir rahbar va xodim oʻz xizmat vazifasini yuksak masʼuliyat, sadoqat va fidoyilik bilan bajarishi, aholi murojaatlariga oʻz vaqtida munosabat bildirishi hamda huquqbuzarliklarning sabab va shart-sharoitlarini bartaraf etishga alohida eʼtibor qaratishi lozimligi taʼkidlandi.

Yigʻilish yakunida “Xavfsiz va sogʻlom yurt” profilaktik tadbirlari doirasida belgilangan vazifalarning ijrosini soʻzsiz taʼminlash, transport va turizm obyektlarida xavfsizlik hamda jamoat tartibini yanada mustahkamlash boʻyicha masʼullarga tegishli topshiriqlar berildi.

IIV Transport va turizm obyektlarida xavfsizlikni taʼminlash Departamenti Axborot guruhi