Sirdaryo viloyati IIB rahbariyati tomonidan ishsiz yoshlar bandligini taʼminlashga qaratilgan manzilli tadbirlar tashkil etildi
2026-07-05 16:15:00 / Yangiliklar
Kuni kecha davlatimiz rahbarining 30-iyun “Yoshlar kuni” munosabati bilan oʻtkazilgan yoshlar bilan ochiq muloqotida bergan topshiriqlari ijrosini taʼminlash maqsadida Sirdaryo viloyati ichki ishlar boshqarmasi hamda quyi tizimdagi shahar tumanlari tomonidan ishsiz yoshlarni bandligini taʼminlash, ularni kasb-hunarga yoʻnaltirish maqsadida mehnat yarmarkalari tashkil etildi.
Xususan Sirdaryo viloyati Ichki ishlar boshqarmasi boshligʻi rahbarligida viloyat miqyosida istiqomat qiluvchi, ichki ishlar organlari tomonidan otaliqqa olingan, profilaktik nazoratda turuvchi, uyushmagan hamda vaqtincha ishsiz boʻlgan 80 nafar yoshlar Yangiyer shahrida joylashgan ECO+WOOD mebel ishlab chiqaruvchi korxonaga tashrif buyurishdi.
Tashrif davomida yoshlar korxonaning ishlab chiqarish quvvatlari, zamonaviy texnologiyalar asosida yoʻlga qoʻyilgan mehnat jarayonlari, mahsulot tayyorlash bosqichlari hamda xodimlar uchun yaratilgan qulay mehnat sharoitlari bilan yaqindan tanishdi.
Shuningdek, korxona mutaxassislari tomonidan mavjud boʻsh ish oʻrinlari, mehnat shartlari, ish haqqi haqida batafsil maʼlumotlar berildi.
Korxonada ishlash istagini bildirgan yoshlarning hujjatlari shu kunning oʻzida rasmiylashtirilib, ularning bandligini taʼminlash boʻyicha amaliy choralar koʻrildi.
Tadbir doirasida mehnat yarmarkasi ham tashkil etilib, viloyatda faoliyat yuritayotgan ishlab chiqarish korxonalari hamda xizmat koʻrsatish sohasidagi tadbirkorlik subyektlari tomonidan yuzlab boʻsh ish oʻrinlari yoshlar eʼtiboriga havola qilindi.
Ishtirokchilar oʻz qiziqishi va mutaxassisligiga mos ish oʻrinlari bilan tanishish, ish beruvchilar bilan bevosita suhbatlashish hamda zarur hujjatlarini topshirish imkoniyatiga ega boʻldi.
Bundan tashqari tadbirda yoshlar bugungi kunda oʻzlarini oʻylantirib kelayotgan masala, taklif va tashabbuslari bilan viloyat ichki ishlar boshqarmasi boshligʻiga murojaat qilishdi.
Baʼzi yoshlar bandlik, yana baʼzilari esa sogʻligini tiklash maqsadida tibbiy yordam koʻrsatilishida amaliy yordam soʻrashdi.
Roʻyxatga olingan mazkur murojaatlarni tez fursat ijobiy hal etish yuzasidan muddat va masʼullar belgilanib ,ijrosi boshqarma boshligʻi tomonidan nazoratga olinadigan boʻldi.
Qayd etish kerakki yoshlarning bandligini taʼminlash, kasb-hunarga boʻlgan qiziqishini oshirish, ularni turli salbiy illatlardan asrash hamda hayotda oʻz oʻrnini topishiga koʻmaklashish maqsadidagi “Yoshlar kuni” doirasida shu kabi tadbirlar viloyatning 8 ta tumanlarida ham tashkil etilib, qariyb 380 nafar yosh qamrab olindi.
Sirdaryo viloyati Ichki ishlar boshqarmasi boshligʻi tomonidan yoshlarni har tomonlama qoʻllab-quvvatlash, ularning taklif va tashabbuslarini roʻyobga chiqarish, bandligini taʼminlash qaratilgan manzilli uchrashuv muloqotlar davom etmoqda.
Sirdaryo viloyati IIB Axborot xizmati