Toshkent viloyatida “Xavfsiz va sogʻlom yurt” kompleks tezkor-profilaktik tadbirlarini samarali tashkil etish va jamoat xavfsizligini taʼminlash masalalari muhokama qilindi
2026-07-03 08:00:00 / Yangiliklar
Mamlakatmiz hududida jinoyatlarni barvaqt oldini olish, huquqbuzarliklar profilaktikasini amalga oshirish, jamoat xavfsizligini taʼminlash, aholi salomatligi va millat genofondini giyohvandlik xavfidan himoya qilish maqsadida 1-iyul sanasidan “Xavfsiz va sogʻlom yurt” kompleks tezkor-profilaktik tadbirlarini oʻtkazishga kirishildi.
Oʻzbekiston Respublikasi Ichki ishlar vaziri general-leytenant Aziz Tashpulatov rahbarligida Toshkent viloyati IIBBda oʻtkazilgan navbatdagi tezkor yigʻilishda asosiy eʼtibor keng koʻlamli tadbirlarning viloyat hududida olib borilishi boʻyicha belgilangan vazifalarga qaratildi.
Toshkent viloyati ichki ishlar bosh boshqarmasi sohaviy xizmatlari va mintaqaviy hudud rahbarlari, tuman IIB boshliqlari hamda huquqni muhofaza qilish organlari masʼullari va jamoatchilik vakillari ishtirok etgan yigʻilishda, sohaga oid har bir yoʻnalish boʻyicha oylik davomida eʼtibor qaratilishi zarur boʻlgan dolzarb masalalar muhokama qilindi.
Birinchi navbatda profilaktik tadbirlarni kuchaytirish, aholi ayniqsa yoshlar qatlamini qamrab olish, ularning giyohvandlik bilan bogʻliq noqonuniy holatlar taʼsiriga tushib qolmasliklari uchun kuchli immunitet hosil qilish, bu borada ayniqsa sogʻliqni saqlash tizimi, shifokor-narkologlar hamda psixologlar bilan hamkorlikda ish olib borish boʻyicha muhim topshiriqlar berildi.
Yigʻilishda asosiy eʼtibor kiberxavfsizlikni kuchaytirishga hamda aholini axborot texnologiyalari sohasidagi jinoyatlarga qarshi immunitetini mustahkamlash yuzasidan targʻibot ishlarini uzluksiz amalga oshirishga qaratildi.
Oylik davomida shuningdek, saf boʻlinmalarining kuchaytirilgan tartibdagi xizmat faoliyati yoʻlga qoʻyilib, jamoat joylarida maishiy huquqbuzarliklarni bartaraf etish, yoʻl transport hodisalarini oldini olish, tigʻli buyum bilan bogʻliq koʻngilsiz holatlarni yuz berishiga yoʻl qoʻymaslik maqsadida nazorat tadbirlari kuchaytiriladi.
Tezkor-qidiruv tadbirlarida giyohvandlik vositalarini internet orqali tarqatilishiga qarshi kurashish va narkolabaratoriyalarni aniqlash, bu borada keng jamoatchilikning ham faolligini oshirishga eʼtibor qaratiladi. Tezkor tuzilmalarning hududiy huquqni muhofaza qilish organlari bilan hamkorligi yanada kuchaytirilib, har qanday jinoiy holatga nisbatan qonun ustuvorligi va jazo muqarrarligini taʼminlash yuzasidan masʼullarga aniq vazifalar yuklatildi.
Shuningdek mahallalardagi kriminogen vaziyatni barqarorlashtirish, birinchi navbatda qizil toifadagi mahallalarda izchil ish olib borish, tashkil etilgan ishchi guruhlar faoliyatini muvofiqlashtirishda albatta hududlarning oʻziga xos jihatlarini inobatga olish zarurligi qayd etildi.
Yigʻilish yakunida barcha masʼullarga belgilangan vazifalarning ijrosini oʻz vaqtida va sifatli taʼminlash, profilaktik tadbirlarni manzilli tashkil etish hamda har bir holat boʻyicha shaxsiy masʼuliyat asosida ish olib borish yuzasidan aniq topshiriqlar berildi.