IIV Qorovul qoʻshinlari qoʻmondonligida birinchi yarim yillik yakuni boʻyicha videokonferensiya orqali yigʻilish boʻlib oʻtdi
2026-07-01 16:50:00 / Yangiliklar
Joriy yilning 30-iyun kuni Ichki ishlar vazirligi Qorovul qoʻshinlari qoʻmondoni polkovnik X.A. Batirov raisligida Qoʻmondonlikning markaziy studiyasidan videokonferensaloqa (VKA) tizimi orqali kengaytirilgan yigʻilish oʻtkazildi.
Yigʻilishda harbiy qism va boʻlinmalarining 2026-yilning birinchi yarim yilligi davomida amalga oshirgan jangovar-xizmat faoliyati sarhisob qilinib, erishilgan ijobiy natijalar, yoʻl qoʻyilgan kamchiliklar hamda istiqboldagi ustuvor vazifalar atroflicha tahlil qilindi.
Hisobot davrida harbiy qism va boʻlinmalardagi jangovar shayligi va xizmat samaradorligini oshirish borasida ijobiy natijalarga erishilgani taʼkidlandi.
Buning natijasida muhim va strategik ahamiyatga ega boʻlgan qoʻriqlanayotgan obyektlar xavfsizligini taʼminlash sifati yangi bosqichga olib chiqilgani, boʻlinmalarda maʼnaviy-maʼrifiy ishlarni toʻgʻri tashkillashtirilganligi hamda intizombuzarlikning oldini olish borasidagi profilaktik tadbirlar natijasida huquqbuzarliklar soni keskin kamaygani, shaxsiy tarkib oʻrtasida harbiy intizom sezilarli darajada mustahkamlangani,
qoʻriq ostidagi obyektlar, nazorat-oʻtish joylari zamonaviy muhandislik-texnik qoʻriqlash vositalari hamda ilgʻor axborot-kommunikatsiya texnologiyalari bilan qayta jihozlangani qayd etildi. Yigʻilishda erishilgan yutuqlar bilan bir qatorda, faoliyatda yoʻl qoʻyilgan ayrim nuqsonlar va sustkashliklar ham tanqidiy va prinsipial ruhda muhokama qilindi. Ayrim hududiy boʻlinmalarda ijro intizomining yetarli darajada emasligi, ayrim masʼul harbiy xizmatchilarning oʻz xizmat vazifalariga sidqidildan yondashmaganliklari sababli shaxsiy tarkib oʻrtasida harbiy intizomning susayishi holatlari keskin tanqid qilindi.
Mavjud kamchiliklarni zudlik bilan bartaraf etish maqsadida sohaga masʼul rahbarlarga shaxsiy javobgarlik yuklatildi. Yigʻilish yakunida aniqlangan barcha muammolarni qisqa muddatlarda toʻliq hal qilish va kelgusida bunday kamchiliklarga yoʻl qoʻymaslik boʻyicha aniq koʻrsatmalar hamda chora-tadbirlar belgilab berildi.