Aholi murojaatlari davlat eʼtiborida: mamlakatimiz boʻylab ichki ishlar organlarida navbatdagi sayyor qabullar oʻtkazildi
2026-06-29 08:00:00 / Yangiliklar
Yurtimizda jismoniy va yuridik shaxslarning murojaatlarini koʻrib chiqish, aholining muammo va takliflarini tinglash hamda ularning qonuniy huquq va manfaatlarini taʼminlash davlat siyosatida ustuvor vazifalardan biri hisoblanadi.
Shu maqsadda Davlatimiz rahbari tomonidan belgilangan topshiriqlar ijrosini taʼminlash yuzasidan ichki ishlar organlari tomonidan aholi bilan muntazam ochiq muloqotlar va sayyor qabullar tashkil etib kelinmoqda.
Joriy yilning 28-iyun sanasida Ichki ishlar vaziri general-leytenant Aziz Tashpulatov ishtirokida navbatdagi sayyor qabul boʻlib oʻtdi. Unda vazir oʻrinbosarlari, sohaviy xizmatlarning rahbarlari va masʼul xodimlar ishtirok etib, fuqarolarning murojaatlarini qabul qilish, ularni har tomonlama oʻrganish hamda amaliy yechimlar ishlab chiqishga alohida eʼtibor qaratildi.
Fuqarolar uchun qulay sharoit yaratish maqsadida qabullar hududlar kesimida turli shakllarda tashkil etildi. Toshkent shahri va Toshkent viloyati aholisi bilan bevosita uchrashuvlar oʻtkazilgan boʻlsa, Qoraqalpogʻiston Respublikasi hamda respublikaning boshqa hududlarida yashovchi fuqarolar videokonferensiya aloqasi orqali murojaat qilish imkoniga ega boʻldilar. Bu amaliyot aholiga ortiqcha vaqt va mablagʻ sarflamasdan oʻz murojaatlarini yetkazish imkonini yaratdi.
Qabullar davomida ichki ishlar organlari faoliyatiga doir turli yoʻnalishlardagi masalalar koʻrib chiqildi. Xususan, fuqarolar oʻrtasidagi moliyaviy munosabatlar, surishtiruv va tergov ishlarida uchrayotgan muammolar, ijtimoiy himoya, avvalgi ish joyiga qayta tiklanish, shuningdek boshqa huquqiy masalalar boʻyicha murojaat va takliflar bildirildi.
Tadbir yakuniga koʻra, jami 432 ta murojaat roʻyxatga olindi. Ularning 255 tasi yoki 59 foizi qabul jarayonining oʻzida ijobiy hal etildi. Qolgan 177 ta murojaat esa qoʻshimcha oʻrganishni talab qilganligi sababli nazoratga olinib, tegishli sohaviy xizmatlar tomonidan ijroga qaratildi.
Shu bilan birga, Qoraqalpogʻiston Respublikasi, Toshkent shahri va viloyatlar ichki ishlar organlari rahbarlari tomonidan oʻtkazilgan qabullar davomida ham 401 ta murojaat qabul qilindi.
Shulardan 160 tasi, yaʼni 40 foizi joyida hal etildi, 241 ta murojaatlar qoʻshimcha tekshirish va huquqiy baholash ishlarini amalga oshirish uchun tegishli tartibda koʻrib chiqishga yoʻnaltirildi.
Bu kabi sayyor qabullar davlat organlari bilan aholi oʻrtasidagi oʻzaro muloqotni yanada mustahkamlash, davlat idoralariga nisbatan ishonchni oshirish va fuqarolarni qiynayotgan muammolarni tezkor hal etishda muhim ahamiyat kasb etayotgani bois, ularni mamlakatimizning barcha hududlarida muntazam ravishda davom etib kelmoqda.