Oʻzbekiston Respublikasi Ichki ishlar vaziri general-leytenant Poʻlat Bobojonov boshchiligidagi vazirlik delegatsiyasi Minsk shahrida boʻlib oʻtgan MDHga aʼzo davlatlar ichki ishlar vazirlari Kengashining navbatdagi majlisida ishtirok etdi
2024-08-09 20:00:00 / Majlislar
Kengash yigʻilishida Ozarbayjon, Belarus, Qozogʻiston, Qirgʻiziston, Tojikiston, Turkmaniston va Rossiya Federatsiyasi ichki ishlar vazirliklari rahbarlari, shuningdek, MDHga aʼzo davlatlar hududida uyushgan jinoyatchilik va boshqa xavfli jinoyatlarga qarshi kurashni muvofiqlashtirish Byurosi, Hamdoʻstlik mamlakatlarining Ijroiya qoʻmitasi va Aksilterror markazi masʼullari qatnashdilar.
Tomonlar MDH doirasidagi koʻp tomonlama hamda ikki tomonlama hamkorlikning ustuvor masalalarini, shuningdek, MDH mamlakatlari ichki ishlar vazirliklari Kengashi doirasida qabul qilingan 2024–2028-yillarda jinoyatchilikka qarshi kurashish boʻyicha qoʻshma chora-tadbirlar boʻyicha Davlatlararo dasturini amalga oshirishga doir masalalarni muhokama qildilar.
Tadbir jarayonida bir qator masalalar yuzasidan tegishli hujjatlar imzolandi, jumladan, axborot-kommunikatsiya texnologiyalaridan foydalangan holda sodir etilgan jinoyatlar bilan kurashish sohasida MDHga aʼzo davlatlar ichki ishlar vazirliklari oʻrtasidagi hamkorlikning istiqbolli yoʻnalishlari, kiberjinoyatlarga qarshi kurashda davlatlararo axborot hamkorligini takomillashtirish va boshqalar.
Doʻstona va konstruktiv ruhda oʻtgan tadbirda tomonlar, mazkur formatdagi uchrashuvlar idoralar oʻrtasidagi hamkorlikni mustahkamlashga xizmat qilayotganiga alohida urgʻu berib, Belarus Respublikasi Ichki ishlar vazirligi tomonidan tadbir yuqori darajada tashkil etilganini va bu uning muvaffaqiyatli oʻtkazilishida muhim omil boʻlganini taʼkidlab oʻtdilar.