Ichki ishlar vazirligida 27-iyun – Matbuot va ommaviy axborot vositalari xodimlari kuni munosabati bilan tantanali tadbir boʻlib oʻtdi
2026-06-27 08:00:00 / Yangiliklar
Soʻnggi yillarda Muhtaram Yurtboshimiz tomonidan davlat organlarida ochiqlikni taʼminlashga alohida eʼtibor qaratilib, soʻz erkinligi xalqaro darajada mustahkamlandi. Bu borada ommaviy axborot vositalari va davlat tashkilotlar oʻrtasida koʻprik vazifasini bajarayotgan Axborot xizmatlari oʻrinini ham alohida qayd etish lozim.
27-iyun – Matbuot va ommaviy axborot vositalari xodimlari kuni munosabati bilan Ichki ishlar vazirligida tashkil etilgan bayram tadbirida vazirlik rahbariyati, faxriylar, hududiy va sohaviy xizmat rahbarlari, tizimda faoliyat yuritayotgan ommaviy kommunikatsiyasi vakillari va ijodkorlar ishtirok etdi.
Tadbirni ochib bergan Ichki ishlar vaziri general-leytenant Aziz Tashpulatov barcha yigʻilganlarni bayram bilan bilan tabriklab, bugungi sana nafaqat ommaviy axborot vositalari vakillari balki butun xalqimiz uchun katta ahamiyatga ega ekanligini eʼtirof etdi.
Jamiyatimizda ichki ishlar organlarining ijobiy imijini yaratishda oʻz salohiyati bilan hissa qoʻshayotgan axborot xizmati xodimlari, texnik va ijodkorlarning samarali mehnatida natijasida bugun yurtdoshlarimiz sohadagi sharafli xizmat faoliyati haqida muntazam xabardor etib kelinmoqda.
Erishilayotgan ijobiy natijalarni barqaror davom ettirish, yuz bergan har bir holatga tezkorlik bilan munosabat bildirish orqali jamoatchilik ishonchini oshirish, jurnalist va blogerlar bilan uzviy hamkorlikni yoʻlga qoʻyish boʻyicha zarur vazifalar haqida toʻxtalib oʻtildi.
Ayniqsa, sunʼiy intellekt texnologiyalarini faoliyatga muvaffaqiyatli integratsiya qilish zarurligi zamon talabiga aylanib borayotganligi taʼkidlanib, masʼullarga bu yoʻnalishda bajarilishi lozim boʻlgan bir qator vazifalar yetkazildi.
Shundan soʻng Ichki ishlar vazirligi Axborot xizmati tomonidan tayyorlangan videolavha yigʻilganlar eʼtiboriga havola etildi. Hozirda Oʻzbekiston Milliy teleradiokompaniyasi va Milliy media assotsiatsiyasi bilan tuzilgan memorandumlar asosida, ayni vaqtda tizim faoliyatiga oid 15 ta kunlik va haftalik maxsus koʻrsatuv hamda turli dasturlar namoyish etilmoqda.
Jahon veb-makonida vazirlik sohaviy xizmatlari hamda hududiy ichki ishlar organlarining jami 24 ta veb-sayt muntazam faoliyat yuritmoqda. Mazkur veb-saytlar eng ommabop ijtimoiy tarmoqlar va videoxostinglarga integratsiya qilingan boʻlib, ular orqali millionlab kuzatuvchilar qamrab olingan.
Tadbir yakunida bir guruh xodimlarga 27-iyun – Matbuot va ommaviy axborot vositalari xodimlari kuni munosabati bilan ichki ishlar vazirining buyrugʻi bilan mukofotlar topshirildi.