O‘zbеkiston Rеspublikаsi Ichki ishlаr vаzirligi

Oʻzbekiston Respublikasi Ichki ishlar vazirining tegishli topshirigʻiga asosan, Buxoro viloyati hokimi boshchiligida axborot texnologiyalari yordamida sodir etilayotgan jinoyatlarning barvaqt oldini olish hamda raqamli xavfsizlikni taʼminlash holatiga bagʻishlangan tanqidiy yigʻilish boʻlib oʻtdi.

Yigʻilishda taʼkidlanganidek, axborot texnologiyalari rivojlanib, raqamli imkoniyatlar kengayishi bilan kiberjinoyatchilik ham tobora oshib bormoqda.

Viloyatda bu turdagi jinoyatlar, xususan, plastik kartalardan noqonuniy pul yechib olish bilan bogʻliq oʻgʻrilik va firibgarlik holatlari umumiy jinoyatlarning asosiy qismini tashkil etmoqda.

Aholi oʻrtasida kibergigiyena va raqamli xavfsizlik madaniyatini shakllantirish boʻyicha targʻibot tadbirlari yetarli darajada olib borilmayotganligi oqibatida koʻplab fuqarolarimiz, jumladan, nafaqaxoʻrlar, ishsizlar va davlat xizmatchilari ham firibgarlar tuzogʻiga tushib qolmoqda.

Viloyat hokimining tegishli farmoyishi asosida kiberjinoyatlarga qarshi kurashish boʻyicha aniq vazifalar belgilab berilgan boʻlishiga qaramay, ayrim rahbarlar bu jarayonni faqat chetdan kuzatish bilan cheklanib qolayotganligi qattiq tanqid qilindi.

Tashkilot va idoralarda kiberxavfsizlik soatlari oʻtilmayotganligi, mahalla faollari hamda bank xodimlari tomonidan aholini ogohlantirish ishlari oqsoqlanayotganligi, shahar va tumanlardagi katta ekranlarda doimiy ravishda ogohlantiruvchi roliklar namoyish qilinmayotganligi muammoning yanada chuqurlashishiga sabab boʻlmoqda.

Muhokama davomida, zararli dasturlar va turli soxta ilovalar orqali sodir etilayotgan firibgarliklarning barvaqt oldini olishga alohida urgʻu qaratilib, har qanday shubhali dasturni telefonga oʻrnatishdan oldin mutaxassislar yoki maxsus botlar orqali tekshirib koʻrish madaniyatini shakllantirish yuzasidan qatʼiy topshiriqlar berildi.

Mazkur yoʻnalishdagi ishlarni jadallashtirish va mutasaddilarning masʼuliyatini oshirish maqsadida, fosh etilmagan hamda vazirlik nazoratiga olingan jinoyatlarni ochish natijadorligini doimiy ravishda muhokama qilib borish amaliyoti yoʻlga qoʻyilishi belgilandi.

Shuningdek, fuqarolarni ijtimoiy tarmoqlardagi xavflardan ishonchli himoya qilish uchun “Cyber-shield” Telegram botini barcha mahalla, tashkilot va korxonalarning Telegram kanallariga ulash choralari koʻriladi.

Jinoyatchilikni jilovlashning dasturiy taʼminotini kuchaytirish doirasida tegishli organlardan elektron sanksiyalarni olib, “Cardblock” tizimiga oʻz vaqtida kiritishni qatʼiy nazoratga olish hamda sodir etilgan har bir jinoyat haqidagi maʼlumotlarni “Turon” axborot tizimiga zudlik bilan toʻliq kiritilishini taʼminlash boʻyicha kechiktirib boʻlmaydigan vazifalar belgilab olindi.

Buxoro viloyati IIB Axborot xizmati