IIV Qorovul qoʻshinlari qoʻmondoni boshchiligida harbiy qism va boʻlinmalarda inspektorlik tekshiruvi oʻtkazildi
2026-06-23 14:30:00 / Yangiliklar
2026-yilning 18-20-iyun kunlari Oʻzbekiston Respublikasi Ichki ishlar vazirligi Qorovul qoʻshinlari qoʻmondoni polkovnik Xasan Batirov boshchiligida 7552 harbiy qismda keng qamrovli inspektorlik tekshiruvi oʻtkazildi. Ushbu tadbirdan koʻzlangan asosiy maqsad — boʻlinmalarning jangovar shayligi, shaxsiy tarkibning xizmat olib borish sifati hamda harbiy intizom holatini har tomonlama baholashdan iborat boʻldi. Tekshiruv davomida harbiy xizmatchilarning kundalik jangovar va xizmat faoliyatlarini tashkil etish jarayonlariga alohida eʼtibor qaratildi. Shaxsiy tarkibning nazariy va amaliy bilim koʻnikmalarini mustahkamlash, shuningdek, huquqiy va kasbiy tayyorgarlik darajasini aniqlash maqsadida qatʼiy savol-javob sinovlari oʻtkazildi. Unda har bir harbiy xizmatchining oʻz xizmat vazifalariga va nizom talablariga qay darajada sodiqligi sinovdan oʻtdi. Polkovnik Xasan Batirov tekshiruv yakunlari boʻyicha shaxsiy tarkib bilan oʻtkazilgan suhbatda harbiy intizom har qanday muvaffaqiyatli jangovar xizmat faoliyatining asosi ekanligini alohida taʼkidladi. Har bir harbiy xizmatchining yuksak maʼnaviy-ruhiy holati, hushyorligi va vatanga boʻlgan sadoqati — xizmat olib borilayotgan strategik ahamiyatga ega obyektlar xavfsizligining bosh garovidir.
Tekshiruv yakunida aniqlangan kamchiliklar atroflicha muhokama etilib, kelgusida jangovar xizmat samaradorligini yanada oshirish va shaxsiy tarkibning hushyorligini susaytirmaslik boʻyicha qoʻmondonlik tomonidan tegishli topshiriq va koʻrsatmalar berildi.