Interpol tomonidan oʻta yirik miqdordagi firibgarlik uchun qidiruvda boʻlgan shaxslar Oʻzbekistonga ekstraditsiya qilindi
2026-06-20 13:00:00 / Yangiliklar
Interpolning Toshkent va Abu Dabi shaharlaridagi Milliy markaziy byurolarining hamkorlikdagi saʼy-harakatlari bilan xalqaro miqyosda Interpol kanallari orqali qidiruvda boʻlgan jinoyatchilarni topshirish masalasi hal etildi.
Interpolning Toshkent va Abu-Dabi shaharlaridagi Milliy markaziy byurolarining yaqin hamkorligi, shuningdek, Oʻzbekiston Respublikasi Ichki ishlar vazirligining Dubaydagi Bosh konsulxonasi huzuridagi vakilining koʻmagi va har tomonlama qoʻllab-quvvatlashi natijasida xalqaro qidiruvda boʻlgan shaxslar Oʻzbekistonning huquqni muhofaza qiluvchi organlariga topshirildi.
Ushbu fuqarolar oʻta yirik miqdordagi firibgarlik jinoyatini sodir etganliklari uchun Oʻzbekiston Respublikasining vakolatli organlari tomonidan qidiruvga berilgan edi.
Xorijiy hamkorlar va Oʻzbekiston tomonining kelishilgan saʼy-harakatlari tufayli qidiruvdagi shaxslar Interpol Milliy markaziy byurosi xodimlariga topshirilib, Oʻzbekiston Respublikasiga olib kelindi.
Hozirgi vaqtda qoʻlga olinganlar zarur protsessual harakatlarni amalga oshirish uchun tergov organlariga topshirilgan. Kelgusida ular sud oldida javob beradi va ularga nisbatan Oʻzbekiston Respublikasi qonunchiligiga muvofiq jazo belgilanadi.
Oʻzbekiston Respublikasi Ichki ishlar vazirligining Interpol Milliy markaziy byurosi sodir etilgan jinoyatlar uchun jazoning muqarrarligi tamoyilini taʼminlagan holda, chet elda odil sudlovdan yashirinib yurgan shaxslarning manzilini aniqlash va mamlakat hududiga qaytarish boʻyicha tizimli ishlarni davom ettirmoqda.
Oʻzbekiston Respublikasidagi Interpolning Milliy markaziy byurosi