Oʻzbekiston Respublikasi Qoʻriqlash departamenti delegatsiyasining Belarus Respublikasiga amaliy tashrifi davom etmoqda
2026-06-20 10:00:00 / Yangiliklar
Avval xabar berganimizdek, Minsk shahrida Belarus Respublikasi, Rossiya Federatsiyasi va Oʻzbekiston Respublikasi qoʻriqlash xizmatlari delegatsiyalari ishtirokida Qoʻriqlash departamenti Texnik kengashining ishi davom etmoqda. Ushbu tadbir doirasida davra suhbati oʻtkazilib, unda harbiylashtirilgan qoʻriqlash xizmatini tashkil etish tartibi, xizmatlar qiymatini shakllantirishning mavjud yondashuvlari hamda jismoniy shaxslarning qoʻriqlovini taʼminlash imkoniyatlari haqida maʼlumotlar berildi.
Maʼruzalar doirasida ishtirokchilar oʻz mamlakatlaridagi xizmatlardan misollar keltirib, qoʻriqlash faoliyatini tashkil etish va narx belgilash boʻyicha yondashuvlarni taqqosladilar, shuningdek, eng samarali ishlash modellari yuzasidan fikr almashdilar.
Shundan soʻng delegatsiyalar “Milliy xavfsizlik. Belarus – 2026” xalqaro xavfsizlik sanoati koʻrgazmasiga tashrif buyurdilar. Belarus IIV Qoʻriqlash departamenti ekspozitsiyasi turli obyektlarni muhofaza qilishga moʻljallangan eng zamonaviy qoʻriqlash vositalari va tizimlaridan iborat boʻldi. Asosiy ishlanmalar qatorida axborot resurslarini yagona xavfsizlik ekotizimiga integratsiya qilish, vaziyatli tahlil usullari, treking tizimlari va issiqlikni aniqlash qurilmalari alohida qiziqish uygʻotdi.
Shuningdek, har bir ishtirokchi ushlash guruhi xodimi, kinolog yoki qoʻriqlanuvchi shaxs rolini his qilish imkonini beruvchi VR-maydon ham katta qiziqishga sabab boʻldi.
Jurnalistlar bilan muloqot chogʻida Belarus Respublikasi IIV Qoʻriqlash departamenti boshligʻi, militsiya general-mayori Aleksandr Shepelev quyidagilarni taʼkidladi:
— Belarus IIV Qoʻriqlash departamenti koʻplab davlatlar, ayniqsa MDH mamlakatlari uchun qoʻriqlash sohasini rivojlantirish, innovatsiyalarni joriy etish va ishonchli qoʻriqlash xizmatlarini taʼminlash borasida yetakchilardan biri hisoblanadi. Biz hamkasblarimizni toʻplangan tajriba bilan oʻrtoqlashish maqsadida taklif qildik.
Mutaxassislarimiz loyihalarni mustaqil ishlab chiqadi va joriy etadi hamda tuzilgan shartnomalar asosida mulkning saqlanishini kafolatlaydi.
Shundan keyin Rosgvardiyasining Idoradan tashqari qoʻriqlash bosh boshqarmasi va Oʻzbekiston Respublikasi IIV huzuridagi Qoʻriqlash departamenti delegatsiyalari Minsk viloyatidagi boʻlinmalar faoliyati bilan tanishuvni davom ettirib, Soligorsk qoʻriqlash boʻlimi hamda “Respublika speleodavolash shifoxonasi” davlat muassasasiga tashrif buyurdilar.
Tashrif doirasida tezkor navbatchilik xizmati va markazlashtirilgan kuzatuv pulti faoliyatiga alohida eʼtibor qaratildi. Aynan shu yerda sutkaning istalgan vaqtida naryadlar faoliyati muvofiqlashtirilib, hududdagi qoʻriqlanadigan obyektlar xavfsizligi ustidan nazorat amalga oshiriladi.
Xorijiy idoralar vakillari tuman darajasida qoʻriqlash faoliyatini tashkil etish, zamonaviy texnik yechimlar va qoʻriqlash boʻlinmalarining imkoniyatlari bilan amaliy tarzda tanishish imkoniga ega boʻldilar.
Dasturning keyingi qismi Belarus Respublikasidagi eng noyob tibbiyot muassasalaridan biri — Respublika speleodavolash shifoxonasiga tashrif bilan davom etdi. Mehmonlar 420 metr chuqurlikda joylashgan noyob yerosti davolash majmuasiga tushdilar. Bugungi kunda mazkur muassasa yerosti kaliy konlari negizida tashkil etilgan va dori vositalaridan foydalanmasdan davolash usulini qoʻllaydigan dunyodagi yagona faol muassasa hisoblanadi.
Shundan soʻng Rossiya Federatsiyasi va Oʻzbekiston Respublikasi qoʻriqlash xizmatlari delegatsiyalari Belarus Respublikasiga tashrif doirasida Brest viloyatiga yoʻl oldilar.
Mehmonlar tezkor navbatchilik xizmati va viloyat boshqarmasi Monitoring markazi faoliyati, shuningdek obyektlarni qoʻriqlashni tashkil etishda qoʻllanilayotgan zamonaviy texnik vositalar bilan tanishdilar.
Keyin xorijiy idoralar vakillari “Kasbning eng yaxshi vakili” respublika koʻrik-tanloviga tashrif buyurib, ishtirokchilar bilan muloqot qildi hamda amaliyotchi mutaxassislar tomonidan foydalanilayotgan texnik qoʻriqlash vositalari bilan tanishdi.
Brest viloyatida boʻlish davomida delegatsiya Brest qalʼasini himoya qilishda halok boʻlganlar xotirasini yod etib, Mangu olov poyiga gullar qoʻydi va “Urush muzeyi — tinchlik hududi” ekspozitsiyasini tomosha qildi.
Shuningdek, mehmonlar Belovej oʻrmoniga tashrif buyurib, qadimiy texnologiyalar muzeyida boʻldilar. U yerda mehmonlar milliy non bilan kutib olinib, qiziqarli ekskursiya tashkil etildi.