Qashqadaryoda xotin-qizlarni qoʻllab-quvvatlashga qaratilgan oʻrganishlar oʻtkazildi
2026-06-19 15:40:00 / Yangiliklar
Mamlakatimizda xotin-qizlarning manfaatlarini himoya qilish, ularga huquqiy va psixologik koʻmak koʻrsatish hamda oila institutini mustahkamlashga qaratilgan amaliy ishlar izchil davom etmoqda. Shu maqsadda Ichki ishlar vazirligi Jamoat xavfsizligi xizmati HPB boshligʻining oʻrinbosari, polkovnik Nilufar Gʻiyasova Qashqadaryo viloyatining Qarshi shahri, Qarshi va Koson tumanlarida boʻlib, joylarda oʻrganish ishlarini olib bordi.
Dastlab, Qarshi shahridagi “Oila maskani”da yosh nikohlanuvchilar bilan uchrashuv tashkil etildi. Uchrashuvda yosh nikohlanuvchilarga mustahkam oila qurish, huquqiy madaniyatni oshirish va oilaviy munosabatlarda oʻzaro masʼuliyatni kuchaytirishga oid tushuntirishlar berildi.
Shuningdek, huquqiy va psixologik yordamga muhtoj xotin-qizlar bilan muloqotlar oʻtkazilib, ularning muammolari va takliflari oʻrganildi. Tadbir doirasida tashkil etilgan sayyor qabulda ham fuqarolarning murojaatlari tinglanib, zarur huquqiy maslahatlar berildi.
Muxtasar aytganda, Qarshi shahri, Qarshi va Koson tumanlarida amalga oshirilgan oʻrganishlar davomida xotin-qizlarni qoʻllab-quvvatlash, ularning huquqlarini taʼminlash va mavjud muammolarni joyida hal etishga qaratilgan chora-tadbirlarga alohida eʼtibor qaratildi.