Ichki ishlar organlari yosh xodimlari va harbiy xizmatchilarining “Yangi Oʻzbekistonni yoshlar quradi!” shiori ostidagi VI Respublika yoshlar forumi gʻoliblari taqdirlandi
2026-06-19 09:45:00 / Yangiliklar
Ichki ishlar organlari yosh xodimlari va harbiy xizmatchilarining “Yangi Oʻzbekistonni yoshlar quradi!” shiori ostidagi VI Respublika yoshlar forumi yakunlandi.
Forum davomida Jangovar marsh, Eng yaxshi paramedik, CrossFit, Kelajak oʻyinlari, Zakovat intellektual tanlovi hamda Voleybol musobaqalari oʻtkazilib, yosh xodimlarning jismoniy tayyorgarligi, jangovar shayligi, bilim salohiyati va jamoaviylik koʻnikmalari sinovdan oʻtkazildi.
Umumjamoa hisobidagi yakuniy natijalariga koʻra, Samarqand viloyati IIB jamoasi birinchi, Navoiy viloyati IIB ikkinchi, Jazoni ijro etish departamenti esa uchinchi oʻrinni egalladi.
Shuningdek, forum doirasida oʻtkazilgan har bir musobaqa va tanlov yoʻnalishi boʻyicha gʻolib hamda sovrindorlar, “Eng yaxshi yoshlar yetakchisi” va boshqa ragʻbatlantiruvchi yoʻnalishlar gʻoliblari ham taqdirlandi.
Tantanali marosimda Ichki ishlar vaziri oʻrinbosari, polkovnik Diyorbek Sattorov va masʼul rahbarlar ishtirok etib, gʻolib va sovrindorlarga kuboklar, medallar, pul mukofotlari hamda esdalik sovgʻalarini topshirdi.
Forum yosh xodimlarning kasbiy mahorati, liderlik salohiyati, intellektual va jismoniy tayyorgarligini yanada oshirish, ular oʻrtasida hamjihatlik va Vatanga sadoqat tuygʻularini mustahkamlashga xizmat qildi.