O‘zbеkiston Rеspublikаsi Ichki ishlаr vаzirligi

Bugun Minsk shahrida Ichki ishlar vazirligi Qoʻriqlash departamentining Texnik kengashi oʻz ishini boshladi. Tadbirda Rosgvardiyaning Idoradan tashqari qoʻriqlash bosh boshqarmasi hamda Oʻzbekiston Respublikasi Ichki ishlar vazirligi huzuridagi Qoʻriqlash departamenti delegatsiyalari ishtirok etmoqda.

Rasmiy ochilish marosimidan oldin mehmonlar uchun Qoʻriqlash departamenti militsiyasi maxsus boʻlimi xodimlarining koʻrgazmali chiqishlari namoyish etildi. Qoʻriqlash xodimlari himoya qilinayotgan shaxsga nisbatan sodir etilgan hujumni bartaraf etish va uni xavfsiz himoya qilish taktikasini namoyish etdi. Xodimlarning yuqori professional harakatlari xorijiy hamkasblar tomonidan munosib baholandi. Shundan soʻng Texnik kengash yigʻilishining tantanali ochilishi boʻlib oʻtdi.

– Rossiya va Oʻzbekiston qoʻriqlash xizmatlari vakillarini Belarusda samimiy qutlashdan mamnunmiz. Bu muhim va qiziqarli tadbirdir. Boshqa davlatlarning obyektlariga tashrif buyurish imkoniyati har bir tomonning oʻz tajribasi va oʻziga xos yondashuvlari mavjudligini yana bir bor koʻrsatadi. Bugungi uchrashuvning asosiy maqsadi ham mutaxassislar darajasida tajriba almashishdan iborat. Biz uchun qaysi yoʻnalishlar rivojlanayotgani va qaysi qoʻriqlash vositalari eng ishonchli ekanligi haqida oʻzaro fikr almashish muhim ahamiyatga ega, – deya taʼkidladi IIV Qoʻriqlash departamenti boshligʻi, militsiya general-mayori Aleksandr ShEPELEV.

Oʻzbekiston Respublikasi Ichki ishlar vazirligi huzuridagi Qoʻriqlash departamenti boshligʻining xizmatni tashkil etish boʻyicha oʻrinbosari, polkovnik Askar UMAROV qabul qiluvchi tomonga minnatdorlik bildirib, oʻz navbatda quyidagilarni taʼkidladi:

– Oʻzbekiston Respublikasi Ichki ishlar vazirligi va butun delegatsiyamiz nomidan tadbirning yuksak darajada tashkil etilgani uchun samimiy minnatdorlik bildiraman. Belarus qoʻriqlash xizmati biz uchun anʼanaviy ravishda ishonchlilik, intizom va zamonaviy texnologiyalarni samarali qoʻllashning namunasi hisoblanadi.

Rosgvardiyaning Idoradan tashqari qoʻriqlash bosh boshqarmasi boshligʻining oʻrinbosari, politsiya polkovnigi Vadim MAZURENKO esa hamkorlikning amaliy ahamiyatiga toʻxtalib oʻtdi:

– Bizni koʻp yillik hamkorlik munosabatlari bogʻlab turib, tajriba almashish – kelgusidagi rivojlanishning eng maqbul yoʻnalishlarini belgilash imkonini beradi. Oʻtgan yili tashvish signalizatsiyasi tizimlarini standartlashtirish boʻyicha davlatlararo texnik qoʻmita tashkil etildi. Yaqinda Qoʻriqlash departamenti delegatsiyasi Pyatigorsk shahrida boʻlib oʻtgan Texnik kengash yigʻilishida ishtirok etib, raqamli xizmatlar va normativ-huquqiy tartibga solish sohasidagi tajribasi bilan oʻrtoqlashdi. Biz allaqachon nazariyadan amaliyotga oʻtdik, sizlarning tajribangiz esa bizga yanada rivojlanishimizga koʻmaklashmoqda.

Yigʻilishning birinchi kuni doirasida Texnik kengash aʼzolari va mehmonlar qoʻriqlash faoliyatini rivojlantirishning dolzarb masalalarini muhokama qildi. Tadbir davomida qoʻriqlashning texnik vositalarini standartlashtirish, videoanalitika va sunʼiy intellekt tizimlarini joriy etish, shuningdek, xavfsizlik sohasida zamonaviy texnologiyalarni qoʻllash tajribasini almashish masalalariga alohida eʼtibor qaratildi.