IIV Akademiyasi rahbariyati tomonidan Shayxontohur tumani mahallalarida “poytaxt tajribasi” ijrosi oʻrganildi
2026-06-18 09:00:00 / Yangiliklar
Prezidentimiz topshirigʻi asosida “poytaxt tajribasi”ning keng joriy qilinayotgani mahallalarda xavfsiz muhitni shakllantirish, kriminogen omillarni barvaqt oldini olish va aholi osoyishtaligini taʼminlashda muhim omil boʻlmoqda.
Ichki ishlar vazirligi akademiyasi rahbari Rustam Xatamov yangi tizim asosida poytaxtimizning Shayxontohur tumani mahallalarida amalga oshirilayotgan ishlar bilan yaqindan tanishdi.
Dastlabki manzil “Chorsu” mahallasi boʻldi. Hududga biriktirilgan masʼullar, akademiya professor-oʻqituvchilari va magistratura tinglovchilari, “mahalla yettiligi” vakillari ishtirokida ayni yoʻnalishdagi ustuvor vazifalar ijrosi muhokama qilindi.
Qayd etilishicha, mahalla hududida 11 ta “jinoyat oʻchogʻi” aniqlangan. Huquqbuzarliklarning barvaqt oldini olish maqsadida joylarga 17 ta tashvish tugmasi, 264 ta zamonaviy kamera oʻrnatilgan.
Odamlar gavjum maskanlarga qoʻshimcha kuch va vositalar jalb qilinib, xavfsizlik choralari kuchaytirilgan.
Xonadonlarni manzilli oʻrganish natijasida ijtimoiy profilaktika obyektlari aniqlanib, “mahalla yettiligi” xodimlariga yoʻnaltirilgan.
Aholini giyohvandlik, kiberfiribgarlik va boshqa turdagi jinoyatlardan ogoh etish maqsadida targʻibot materiallari tarqatilib, fuqarolarning uyali aloqa vositalariga foydali ilovalar oʻrnatilgan.
Akademiya boshligʻi mahallada kriminogen vaziyatni barqarorlashtirish boʻyicha taqdimot bilan tanishib, xavfsiz muhitni shakllantirish borasida oʻz takliflarini bildirdi.
Ishchi guruh vakillariga aholi bilan jadal manzilli ishlash, jamoat xavfsizligini ishonchli taʼminlash yuzasidan topshiriq berdi.
Shundan soʻng taʼlim muassasasi vakillari tomonidan “Oʻrda” mahallasining kriminogen vaziyati oʻrganildi. Ishchi guruh vakillari bilan birgalikda mahallada sodir etilgan jinoyatlar, ularning asl omillari, “102” tizimi orqali fuqarolardan kelib tushayotgan murojaatlar, yangi tizim asosida erishilayotgan natijalar tahlil qilindi.
Akademiya boshligʻi aholi muammolarini tizimli oʻrganib borish, “jinoyat oʻchoqlari”da xavfsizlik choralarini kuchaytirish, ijtimoiy profilaktika qamrovini oshirish, kriminogen vaziyatga salbiy taʼsir koʻrsatayotgan omillarni bartaraf etish orqali jinoyatchilikni keskin kamaytirish zarurligini qayd etdi.
Yangi tajribalarni yaratib, hududlarga joriy qilish boʻyicha koʻrsatma berdi.
Shuningdek, oʻrganishlar davomida akademiya boshligʻi “Bogʻkoʻcha” mahallasidagi aholi gavjum joylar, savdo va maishiy xizmat koʻrsatish maskanlarini koʻzdan kechirdi.
Fuqarolar bilan muloqot qilib, ularning muammo va takliflarini tingladi.
Hududlarda osoyishtalikni taʼminlash va huquqbuzarliklarning barvaqt oldini olish borasida zarur tavsiyalar berdi.
IIV Akademiyasi Axborot xizmati