Rossiya hududida Oʻzbekiston fuqarolarining huquqlarini himoya qilish masalalari muhokama qilindi
2026-06-16 11:15:00 / Yangiliklar
Joriy yilning 9-13-iyun kunlari Oʻzbekiston Respublikasi Ichki ishlar vazirligi Migratsiya va personallashtirish departamenti vakili Oʻzbekiston Respublikasi Tashqi ishlar vaziri oʻrinbosari O.S. Abdullayev boshchiligidagi idoralararo delegatsiya tarkibida Rossiya Federatsiyasining Sankt-Peterburg shahri, Leningrad viloyati hamda Kaliningrad shahrida oʻtkazilgan mehnat migratsiyasi masalalariga bagʻishlangan ishchi uchrashuvlarda ishtirok etdi.
Muzokaralar davomida tomonlar migratsiya sohasidagi hamkorlikning dolzarb masalalarini, Rossiya hududida mehnat faoliyatini olib borayotgan Oʻzbekiston fuqarolarining huquq va qonuniy manfaatlarini himoya qilish, shuningdek mavjud muammolar va ularni hal etish yoʻllarini muhokama qildilar.
Uchrashuvlarda ikki davlatning tegishli idoralari oʻrtasidagi hamkorlik mexanizmlarini takomillashtirish, migratsiya sohasida qonuniylikni taʼminlash hamda mehnat migrantlari uchun qulay shart-sharoitlar yaratish masalalariga alohida eʼtibor qaratildi.