Surxondaryo viloyati IIBda mahallalarda xavfsiz muhitni yaratish, qoʻriqlash, huquqbuzarliklar profilaktikasi va jinoyatchilikka qarshi kurashish masalalari tanqidiy tahlil qilindi
2026-06-13 16:00:00 / Yangiliklar
Surxondaryo viloyati Ichki ishlar boshqarmasida mahallalarda xavfsiz muhitni yaratish, aholi xavfsizligini taʼminlash, qoʻriqlash xizmati boʻyicha berilgan topshiriqlar ijrosi, xizmat intizomi va qonunchilik hamda sohadagi mavjud muammolarni bartaraf etish maqsadida tanqidiy ruhdagi videoselektor yigʻilishi oʻtkazildi.
Yigʻilish, viloyat ichki ishlar boshqarmasi boshligʻi, polkovnik Timur Ismailov hamda viloyat prokurori Baxtiyar Babadjanovlar rahbarligida boʻlib oʻtdi, unda viloyat va tuman masʼullari ishtirok etishdi.
Yigʻilish davomida Oʻzbekiston Respublikasi Prezidentining PQ-1 va PQ-2 sonli qarorlari ijrosi doirasida amalga oshirilayotgan ishlar atroflicha muhokama qilinib, hududlarda jinoyat va huquqbuzarliklarni barvaqt oldini olish hamda aholi bilan manzilli ishlash samaradorligi tahlil etildi.
Shuningdek, bugungi kunda oʻzining ijobiy natijalari bilan eʼtibor qozonayotgan “Chilonzor tajribasi” va “Mirzo Ulugʻbek tumani tajribasi” asosida olib borilayotgan chora-tadbirlarning ijrosi koʻrib chiqildi. Fuqarolarning murojaatlari bilan ishlash, ariza va shikoyatlarni oʻz vaqtida va sifatli oʻrganish, aholini qiynayotgan muammolarga tezkor yechim topish masalalariga alohida eʼtibor qaratildi.
Yigʻilishda profilaktika inspektorlari tomonidan dastlabki surishtiruv jarayonlarida yoʻl qoʻyilayotgan ayrim xato va kamchiliklar tanqidiy muhokama qilinib, ularni bartaraf etish boʻyicha aniq vazifalar belgilab berildi. Shu bilan birga, qonunchilik talablariga qatʼiy rioya etish, xizmat intizomini mustahkamlash va xizmat faoliyati samaradorligini yanada oshirish yuzasidan masʼullarga tegishli koʻrsatmalar berildi.
Bundan tashqari, qoʻriqlash xizmati boʻyicha berilgan topshiriqlar ijrosi, xonadon, ijtimoiy soha va savdo obyektlarini qoʻriqlovga olish, kiberjinoyatlarga qarshi kurashish, internet orqali sodir etilayotgan firibgarlik holatlarining oldini olish, aholining kiberxavfsizlik boʻyicha huquqiy savodxonligini oshirish hamda yoʻl-transport hodisalarini kamaytirishga qaratilgan profilaktik chora-tadbirlar ham muhokama markazida boʻldi.
Yigʻilish yakunida sohadagi kamchiliklarni bartaraf etish, jinoyatchilik va huquqbuzarliklarni oldini olish, qoʻriqlash yoʻnalishi, ijro intizomi, aholi murojaatlari bilan ishlash sifatini oshirish hamda xizmat intizomini yanada mustahkamlash boʻyicha masʼul rahbar va xodimlarga aniq topshiriqlar berildi.
Zero, tinch va osoyishta hayotni taʼminlash, har bir fuqaroning huquq va manfaatlarini himoya qilish yoʻlida tizimli va samarali faoliyat muhim ahamiyat kasb etadi.
Surxondaryo viloyati IIB Axborot xizmati