IIV rahbariyati Navoiy viloyatida yoʻl-transport hodisalarining oldini olish maqsadida amalga oshirilayotgan ishlar yuzasidan oʻrganish olib bordi
2026-06-12 20:00:00 / Yangiliklar
Navoiy viloyatida yoʻl harakati xavfsizligini taʼminlash va yoʻl infratuzilmasini yanada takomillashtirish boʻyicha qator loyihalar amalga oshirilmoqda.
Tashrif doirasida IIV JXD YHXX rahbariyati boshchiligida hududda olib borilayotgan ishlar oʻrganilib, masʼul tashkilotlar va mutasaddilar ishtirokida harakat ishtirokchilari uchun yanada qulay va xavfsiz shart-sharoitlar yaratish masalalari muhokama qilindi.
Jumladan, Navoiy shahrida “D-076-G” va “85V001” avtomobil yoʻllarini oʻzaro bogʻlovchi 3,5 kilometrlik yangi avtomobil yoʻli qurilishi loyihasi koʻrib chiqildi.
Mazkur loyiha tirbandliklarni oldini olish va harakat ishtirokchilari uchun qoʻshimcha qulayliklar yaratishga xizmat qilishi taʼkidlandi.
Shuningdek, A-379 “Navoiy – Uchquduq” avtomobil yoʻlida uzoq masofaga harakatlanuvchi haydovchilar uchun dam olish va transport vositalarini taʼmirlash imkonini beruvchi zamonaviy avtoturargohlar qurilishi bilan tanishildi.
Navoiy shahridagi Amir Temur va Islom Karimov koʻchalari kesishmasidan shahar hokimligigacha boʻlgan hududda amalga oshirilayotgan rekonstruksiya ishlari ham koʻzdan kechirildi.
Loyiha doirasida yoʻlning oʻtkazuvchanligini oshirish maqsadida u 2 tasmadan 6 tasmaga kengaytirilib, harakat xavfsizligini taʼminlash uchun qoʻshimcha muhandislik yechimlari joriy etilmoqda.
Shuningdek, Navoiy viloyati hokimligi maʼmuriy binosida viloyat hokimi va YHXX rahbari ishtirokida yoʻl-transport hodisalarining oldini olishga bagʻishlangan tanqidiy-tahliliy yigʻilish oʻtkazildi.
Yigʻilishda vazirlik va idoralar masʼul xodimlari, mahalla raislari hamda Navoiy shahridagi maktabgacha taʼlim tashkilotlari rahbarlari ishtirok etdi.
Muhokamalar davomida yoʻl-transport hodisalarining kelib chiqish sabablari, ularning oldini olish borasidagi mavjud kamchiliklar, transport oqimini samarali boshqarish, tirbandliklarni kamaytirish, shaharda zamonaviy avtoturargohlar tashkil etish hamda sifatli va xavfsiz jamoat transporti tizimini rivojlantirish masalalari atroflicha koʻrib chiqildi.
Shu bilan birga, voyaga yetmaganlar ishtirokidagi yoʻl-transport hodisalarining oldini olish, taʼlim muassasalari va mahallalarda profilaktik tadbirlarni kuchaytirish, yoʻl harakati qoidalariga rioya qilish madaniyatini yuksaltirish boʻyicha amalga oshirilayotgan ishlar tahlil qilinib, masʼullarga tegishli vazifa va topshiriqlar berildi.
Ichki ishlar vazirligi Jamoat xavfsizligi departamenti Yoʻl harakati xavfsizligi xizmati Axborot xizmati