Oʻzbekiston va Turkiya ichki ishlar vazirliklari hamkorligi yangi bosqichga koʻtarilmoqda
2026-06-12 16:00:00 / Yangiliklar
Turkiya Respublikasi Ichki ishlar vaziri oʻrinbosari Mehmet Jangir boshchiligidagi delegatsiya Samarqand shahriga tashrif buyurdi.
Tashrif doirasida Oʻzbekiston va Turkiya ichki ishlar vazirliklari oʻrtasidagi hamkorlikni yanada rivojlantirishga qaratilgan Idoralararo muvofiqlashtiruvchi ishchi guruhning yigʻilishi boʻlib oʻtdi.
Uchrashuv davomida jamoat xavfsizligini taʼminlash, transmilliy jinoyatchilikka qarshi kurashish, terrorizm va ekstremizmning oldini olish, shuningdek kiberjinoyatchilikka qarshi samarali hamkorlikni kengaytirish masalalari muhokama qilindi.
Tadbir soʻngida, kelishuvlarni mustahkamlash maqsadida yigʻilish bayonnomasi imzolandi.
Shuningdek, turkiyalik mehmonlar Samarqand viloyati Ichki ishlar boshqarmasining Situatsion markazi faoliyati bilan tanishtirildi.
Tashrif davomida delegatsiya aʼzolari Samarqand shahridagi turistik obyektlarda xavfsiz turizmni taʼminlash boʻyicha amalga oshirilayotgan ishlar bilan ham yaqindan tanishdi.
Doʻstona va konstruktiv ruhda oʻtgan tashrif ikki mamlakat ichki ishlar idoralari oʻrtasidagi oʻzaro ishonch va amaliy hamkorlikni yanada mustahkamlashga xizmat qildi.