IIV Malaka oshirish institutida axborot siyosati va media bilan ishlash masalalariga bagʻishlangan oʻquv mashgʻuloti oʻtkazildi
2026-06-12 09:00:00 / Yangiliklar
Ichki ishlar vazirligi Malaka oshirish institutida vazirlik Axborot xizmati boshligʻi, polkovnik Shoxrux Gʻiyosov ishtirokida professor-oʻqituvchilar va Ichki ishlar organlarining barcha darajadagi boʻlim boshliqlari, tuman (shahar, tarmoq) ichki ishlar organlari boshligʻining oʻrinbosari lavozimiga tayyorlash uchun oʻquv kursi, “podpolkovnik” maxsus unvonini olish uchun navbatdagi maxsus malaka oshirish va ofitserlik lavozimiga tayinlash uchun qayta tayyorlash boʻyicha navbatdagi oʻquv kurslari tinglovchilari uchun oʻquv mashgʻuloti tashkil etildi.
Mashgʻulot davomida ichki ishlar organlari xodimlarining jurnalistlar va blogerlar bilan samarali hamkorlikni yoʻlga qoʻyishi, ommaviy axborot vositalari vakillari bilan toʻgʻri va ochiq muloqotni tashkil etishi, shuningdek, ijtimoiy tarmoqlardan maqsadli hamda masʼuliyat bilan foydalanishi yuzasidan tavsiyalar berildi.
Shuningdek, ichki ishlar organlari faoliyatiga oid ijobiy va xolis axborotlarni keng jamoatchilikka tezkor yetkazish, axborot makonida faol ishtirok etish hamda ijobiy materiallarni keng targʻib qilishning ahamiyati alohida taʼkidlandi.
Tadbir yakunida ishtirokchilarni qiziqtirgan savollarga atroflicha javob berilib, axborot siyosatini samarali amalga oshirish boʻyicha fikr almashildi.
IIV Malaka oshirish instituti