Har bir yosh avlod vakili Davlatimiz rahbarining eʼtiborida: “Ikkinchi imkon” loyihasi asosida jazoni ijro etish muassasalaridagi yoshlarni zamonaviy kasblar va raqamli texnologiyalarga oʻqitishning yangi bosqichi boshlandi
2026-06-11 20:00:00 / Yangiliklar
Yosh avlod vakillari bugungi imkoniyatlarni, ular uchun Davlatimiz rahbari tashabbuslari bilan yaratilayotgan sharoitlarni his etishi, anglashi va unumli foydalanishi kelajakda yaxshi natijalarga erishishda katta ahamiyatga ega. Ayniqsa, jazoni ijro etish muassasalaridagi yoshlarni xorijiy tillar va kasb-hunarga oʻrgatish, sportga jalb etish, gʻoya, hamda startaplariga koʻmak berish, ularni ishli va daromadli qilish gʻoyat muhim vazifa hisoblanadi.
Shu maqsadda Oʻzbekiston Respublikasi Prezidentining “Jazoni ijro etish muassasalaridagi yoshlarni zamonaviy kasblarga oʻqitishga oid chora-tadbirlar toʻgʻrisida”gi 117-sonli qarorining ijrosi doirasida yoʻlga qoʻyilgan “Ikkinchi imkon” loyihasi chin maʼnoda yoshlar uchun yangi imkoniyatlar eshigini ochmoqda.
Jazo muddatini oʻtayotgan yoshlar orasida ham fan, madaniyat, sanʼat, adabiyot, kasb-hunar, sport va boshqa koʻplab sohalarda yuqori potensialga ega iqtidor egalar koʻpchilikni tashkil etadi. Zangiota tumanida joylashgan 24-son tarbiya koloniyasida tashkil etilgan zamonaviy sharoitlarda esa ularning soni yanada ortishi shubhasiz.
Yangi oʻquv xonalarining ochilish marosimida ishtirok etgan Oʻzbekiston Respublikasi Ichki ishlar vaziri general-leytenant Aziz Tashpulatov hamda Raqamli texnologiyalar vaziri Sherzod Shermatov tomonidan Prezidentimiz tashabbusi bilan yoʻlga qoʻyilgan “Ikkinchi imkon” loyihasi yurtimizdagi har bir oʻgʻil-qiz, har qanday vaziyatda eʼtibordan chetda qolmasligining yorqin ifodasi ekanligi eʼtirof etildi.
Yoshlarning jamiyatga moslashishiga koʻmaklashuvchi mazkur oʻquv xonalari, ularning zamonaviy kasblarni egallashiga yordam beruvchi davlat dasturi doirasida tashkil etilgan. Loyiha ishtirokchilari 8-12 oylik intensiv kurslarda dasturlash, veb-dizayn, kompyuter muhandisligi, boshqa kasblar va xorijiy tillarga oʻqitilib, ijtimoiy va huquqiy jihatdan qoʻllab-quvvatlanadi va respublika miqyosida tan olinadigan malakaviy sertifikatlar bilan taʼminlanadi.
“Ikkinchi imkon” loyihasining dastlabki bosqichida jazoni oʻtayotgan yoshlarning qiziqishlari va isteʼdodi Raqamli texnologiyalar vazirligi, Kasbiy taʼlim agentligi, Yoshlar ishlari agentligi vakillari hamda sohaning boshqa mutaxassislaridan iborat tarkibda tuziladigan ishchi guruhning oʻrganishlari natijasida aniqlab olindi.
Oʻquv kurslarini tashkil etish uchun ayni vaqtda Toshkent, Qashqadaryo va Navoiy viloyatlaridagi jami 10 ta jazoni ijro etish muassasalarida sanitariya-qoidalari va gigiyena normativlari hamda oʻquv standartlarga mos 20 ta oʻquv xonasi ajratilib, kompyuter va zaruriy oʻquv qurollari bilan jihozlandi. Mutaxassislar bilan hamkorlikda dastlabki test sinovlari qabul qilinib, dars mashgʻulotlari boshlandi.
Masʼullarga mashgʻulotlarning intensivligini oshirish, zamonaviy kasblar bilan birga maishiy xizmat koʻrsatish sohalarini oʻrgatish boʻyicha mutaxassislarni jalb etish, yoshlarning qiziqishidan kelib chiqib, yoʻnalishlarni koʻpaytirish boʻyicha topshiriqlar berildi.
Bir soʻz bilan aytganda “Ikkinchi imkon” loyihasi umrining eng gullagan davrida xatoga yoʻl qoʻygan yoshlar uchun yangi hayot kurtaklari ochib, hayot soʻqmoqlarida qayta qoqilmasdan, jamiyatda oʻz oʻrnini topishi uchun zamin hozirlamoqda.