Oʻzbekiston MMA assotsiatsiyasi rahbariyati tomonidan sportchilar oʻrtasida tartib-intizom va sport etikasiga rioya etilishi yuzasidan tanqidiy yigʻilish oʻtkazildi
2026-06-11 16:00:00 / Yangiliklar
Uchrashuvning asosiy maqsadi, xalq orasida mashhur boʻlgan media sportchilarning ijtimoiy tarmoqlardagi faoliyati, sport etikasi hamda raqiblarga nisbatan hurmat tamoyillariga rioya etish masalalarini muhokama qilishdan iborat boʻldi.
Yigʻilish davomida keyingi vaqtlarda ijtimoiy tarmoqlarda ayrim sportchilar tomonidan raqiblarga nisbatan nooʻrin va haqoratomuz soʻzlar ishlatilishi holatlari kuzatilayotgani taʼkidlandi. Bu kabi xatti-harakatlar nafaqat sportchining shaxsiy obroʻsiga, balki u vakillik qilayotgan klub, jamoa hamda butun sport turining nufuziga salbiy taʼsir koʻrsatishi qayd etildi va ayrim sportchilarga ogohlantirishlar berildi.
Assotsiatsiya raisi oʻrinbosari oʻz soʻzida MMA nafaqat kuch va mahorat, balki yuqori madaniyat, intizom va hurmatni ham talab qiladigan sport turi ekanini alohida taʼkidladi. U sportchilarni ijtimoiy tarmoqlarda fikr bildirishda masʼuliyatli boʻlishga chaqirib, har qanday bahs-munozaralarda axloq meʼyorlariga amal qilish zarurligini bildirdi.
Shuningdek, yigʻilishda sportchilarning omma oldidagi masʼuliyati haqida ham soʻz yuritildi. Bugungi kunda koʻplab yoshlar mashhur sportchilarni oʻziga namuna sifatida qabul qiladi. Shu sababli har bir sportchining soʻzi va harakati yosh avlod tarbiyasiga taʼsir koʻrsatishi mumkinligi taʼkidlandi. Raqibga nisbatan hurmatsiz munosabat yoki haqoratli chiqishlar yoshlarda notoʻgʻri tushunchalar shakllanishiga sabab boʻlishi mumkinligi aytildi.
Yigʻilish yakunida sportchilar oʻrtasida oʻzaro hurmat muhitini mustahkamlash, sport odobiga qatʼiy rioya qilish va ijtimoiy tarmoqlarda madaniyatli muloqotni yoʻlga qoʻyish boʻyicha tegishli tavsiyalar berildi. Shu bilan birga, kelgusida bunday holatlarning oldini olish maqsadida tushuntirish ishlarini muntazam ravishda olib borish rejalashtirilgani maʼlum qilindi.
Mutasaddilarning taʼkidlashicha, haqiqiy sportchi nafaqat ring yoki oktagondagi gʻalabasi, balki oʻzining madaniyati, odobi va raqiblarga boʻlgan hurmati bilan ham namuna boʻlishi lozim. Sportning asosiy qadriyatlari ham aynan ana shu tamoyillarga tayanadi.
IIV “JAR” sport-sogʻlomlashtirish kompleksi Axborot xizmati