O‘zbеkiston Rеspublikаsi Ichki ishlаr vаzirligi

Oʻzbekiston Respublikasi ichki ishlar, sud va prokuratura organlari, sud-tibbiy ekspertiza hamda adliya tizimi rahbar va masʼul xodimlaridan iborat delegatsiya Xitoy Xalq Respublikasiga amaliy xizmat safari doirasida Pekin shahrida faoliyat yurituvchi Huquqni qoʻllash va ishlarni boshqarish markazlari (Law Enforcement and Case Management Centers) faoliyatini oʻrgandi.

Tergov departamenti boshligʻining birinchi oʻrinbosari, polkovnik Mansur Sattarov boshchiligidagi delegatsiya Pekin shahar Jamoat xavfsizligi bosh boshqarmasining Sichen va Haydyan tumanlarida joylashgan zamonaviy huquqni qoʻllash va ishlarni boshqarish markazlarida boʻlib, ularning tashkiliy tuzilmasi, faoliyat yuritish mexanizmlari hamda raqamli texnologiyalarga asoslangan boshqaruv tizimlari bilan yaqindan tanishdi.

Tashrif davomida mehmonlarga huquqbuzarliklar va jinoyatlar toʻgʻrisidagi xabarlarni qabul qilish, ularni roʻyxatga olish, tekshirish, protsessual harakatlarni amalga oshirish, dalillarni toʻplash va saqlash, shuningdek ishlarning koʻrib chiqilishi ustidan nazoratni taʼminlash jarayonlari haqida batafsil maʼlumot berildi.

Bundan tashqari, amaliy xizmat safari doirasida delegatsiya aʼzolari Pekin politsiya kolleji, Pekin yuqori darajadagi avtonom harakatlanish texnologiyalari boʻyicha namoyish hududining Innovatsion tezkor boshqaruv markazi hamda Pekin shahar Chaoyan tumani Jamoat xavfsizligi boshqarmasi faoliyati bilan ham yaqindan tanishdilar.

Uchrashuvlar va muloqotlar chogʻida tomonlar sudga qadar ish yuritish jarayonlarini raqamlashtirish, jinoyat ishlarini tergov qilishda zamonaviy axborot texnologiyalarini qoʻllash, protsessual nazorat mexanizmlarini takomillashtirish, ish yuritishni soddalashtirish hamda fuqarolar uchun qulay va shaffof xizmat koʻrsatish tizimini yoʻlga qoʻyish boʻyicha Xitoy tajribasini muhokama qildilar.

Tashrif yakunlariga koʻra, Xitoyning huquqni qoʻllash va ishlarni boshqarish markazlari faoliyatini oʻrganish tergov jarayonlarini yanada takomillashtirish, raqamli yechimlarni keng joriy etish va huquqni muhofaza qiluvchi organlar faoliyati samaradorligini oshirish borasida muhim amaliy ahamiyat kasb etishi taʼkidlandi.

Mazkur tashrif Oʻzbekiston va Xitoy huquqni muhofaza qiluvchi organlari oʻrtasidagi hamkorlikni yanada mustahkamlash, ilgʻor tajriba va bilimlar almashish, shuningdek zamonaviy tergov va boshqaruv texnologiyalarini oʻrganish va amaliyotga tatbiq etishga xizmat qilmoqda.

Oʻzbekiston Respublikasi IIV huzuridagi Tergov departamenti