Andijon viloyati IIB rahbariyati tomonidan Andijon shahrida sodir etilgan qotillik jinoyati keng jamoatchilik ishtirokida tanqidiy muhokama qilindi
2026-06-11 14:20:00 / Yangiliklar
Oʻtkazilgan muhokamada ushbu ayanchli voqeaning kelib chiqish sabablari chuqur tahlil qilinib, jinoyatga olib kelgan omillar, ayniqsa atrofdagilarning befarq munosabati keskin qoralandi.
Taʼkidlanganidek, oʻz vaqtida ogohlik va masʼuliyat bilan yondashilganda bu fojianing oldini olish imkoni mavjud edi.Yigʻilishda oilaviy-turmush munosabatlari doirasida sodir etilayotgan huquqbuzarlik va jinoyatlarning ogʻir oqibatlari hayotiy misollar orqali tushuntirilib, “menga nima” qabilidagi loqaydlik jamiyat uchun eng katta xavflardan biri ekani alohida qayd etildi.
Shuningdek, yoshlar tarbiyasi, oilalarda sogʻlom maʼnaviy muhitni shakllantirish, fuqarolarning huquqiy ongi va madaniyatini yuksaltirish, jamiyatda oʻzaro hurmat va masʼuliyat muhitini kuchaytirish bugungi kunning dolzarb vazifasi ekani taʼkidlandi.
Bundan tashqari, bugungi kunda tobora avj olayotgan kiberjinoyatchilik, shuningdek, uy-joy va avtomashina oldi-sotdisi bilan bogʻliq firibgarlik holatlari ham muhokamaning asosiy mavzularidan biri boʻldi. Fuqarolarga nomaʼlum shaxslarga ishonmaslik, har qanday moliyaviy munosabatlarda hushyor boʻlish va qonuniy hujjatlarga alohida eʼtibor qaratish zarurligi tushuntirildi.
Tadbir yakunida mahalla faollari tomonidan sodir etilgan mudhish holatda ularning ham oʻziga yarasha aybi bor ekanligi taʼkidlanib, bundan keyin qoʻni-qoʻshnilar oʻrtasida boʻlayotgan nizoli holatlarga befarq munosabatda boʻlmaslik borasida oʻz fikr-mulohazalarini bildirdilar.
“Jinoyatga qarshi kurashish — avvalo befarqlikka qarshi kurashishdir”, degan mazmundagi chaqiriq tadbirning asosiy gʻoyasiga aylandi. Chunki ogohlik bor joyda — xavf kamayadi, birlik va hamjihatlik bor joyda esa tinchlik mustahkam boʻladi.
Andijon viloyati IIB Axborot xizmati