Respublika idoralararo muvofiqlashtirish shtabi tomonidan Jizzax viloyatida tergov sifatini oshirish masalalari muhokama qilindi
2026-06-10 18:40:00 / Yangiliklar
Yuqorida xabar berganimizdek, Ichki ishlar vazirining birinchi oʻrinbosari, general-mayor B. Qudratxoʻjayev hamda Bosh prokurorning birinchi oʻrinbosari B. Valiyev rahbarligidagi ishchi guruh Jizzax viloyatida oʻrganish ishlarini davom ettirib, Davlat rahbarining 2025-yil 5-mart kuni Korrupsiyaga qarshi kurashish milliy kengashi yigʻilishida tergov sifatini oshirish va uni yangi bosqichga olib chiqish yuzasidan berilgan topshiriqlari ijrosi bilan yaqindan tanishdi.
Xususan, viloyat prokuraturasi va IIB huzuridagi TB tergovchilari ish yurituvidagi jinoyat ishlari boʻyicha dastlabki tergov harakatlarini olib borilishi, hududda sodir etilgan jinoyatlarni fosh etish borasida amalga oshirilayotgan ishlar ahvoli muhokama qilinib, sohada yoʻl qoʻyilgan xato va kamchiliklar, amaliyotdagi mavjud muammoli masalalar tahlil etilib, masʼullarga zaruriy koʻrsatmalar berildi.
Shuningdek, tergov sifatini yanada yaxshilash, dalillarni oʻz vaqtida olinishi, rasmiylashtirilishida raqamli texnologiyalar imkoniyatlaridan keng foydalanish, jinoyat-protsessual qonunchilik talablariga qatʼiy rioya etish, jinoyat oqibatida yetkazilgan zararning dastlabki tergov davrida undirilishiga qaratilgan barcha protsessual harakatlarni amalga oshirish, sohani raqamlashtirishga alohida eʼtibor qaratish, tergovchilar, xususan, yosh mutaxassislarning tergov sifati va ish samaradorligini oshirish maqsadida muntazam ravishda ularning bilim va koʻnikmalarini oshirib borish yuzasidan tegishli topshiriqlar berilib, ijrosi nazoratga olindi.
Jizzax viloyati IIB Axborot xizmati