Andijon viloyatida Qoʻriqlash xizmati samaradorligi va obyektlar xavfsizligi oʻrganildi
2026-06-09 11:00:00 / Yangiliklar
Ichki ishlar vazirligi huzuridagi Qoʻriqlash departamenti boshligʻi tomonidan Andijon viloyatida Qoʻriqlash xizmati faoliyati samaradorligi, qoʻriqlovga olingan obyektlarda xavfsizlik choralarining taʼminlanishi hamda sohada amalga oshirilayotgan ishlar holati oʻrganildi.
Oʻrganishlar davomida hududiy qoʻriqlash boʻlinmalarining xizmatni tashkil etish holati, tezkor harakatlanuvchi guruhlarning shayligi, boshqaruv markazlari faoliyati, texnik qoʻriqlash vositalaridan samarali foydalanish, shuningdek, qoʻriqdagi obyektlarda sodir etilishi mumkin boʻlgan huquqbuzarlik va favqulodda holatlarning oldini olishga qaratilgan profilaktik chora-tadbirlar tahlil qilindi.
Xususan, obyektlarda oʻrnatilgan videokuzatuv kameralari, tashvish xabarini uzatish qurilmalari, kirish-chiqish nazorati tizimlari hamda boshqa texnik vositalarning ishlash holati koʻzdan kechirildi. Masʼul xodimlar bilan suhbatlar oʻtkazilib, xizmat intizomi, fuqarolar va tadbirkorlik subyektlariga koʻrsatilayotgan xizmatlar sifati hamda tezkorlikni yanada oshirish masalalariga alohida eʼtibor qaratildi.
Shuningdek, qoʻriqlovga olingan obyektlar rahbarlari bilan uchrashuvlar tashkil etilib, mavjud muammolar, takliflar va kelgusida xavfsizlikni kuchaytirish boʻyicha amalga oshirilishi lozim boʻlgan vazifalar muhokama qilindi. Obyektlarning xususiyatidan kelib chiqib, qoʻriqlov rejalarini takomillashtirish, xavfsizlik darajasini oshirish va zamonaviy texnik vositalarni keng joriy etish boʻyicha tegishli koʻrsatmalar berildi.
Tashrif davomida Qoʻriqlash xizmati xodimlarining kasbiy tayyorgarligi, xizmat vazifalarini bajarishdagi masʼuliyati hamda tezkor harakatlanuvchi guruhlarning chaqiruvlarga hozirjavobligi ham oʻrganildi. Xodimlarga jamoat tartibini saqlash, mulk daxlsizligini taʼminlash, fuqarolar murojaatlariga tezkor va sifatli yondashish borasida aniq vazifalar belgilab berildi.
Qayd etildiki, Qoʻriqlash departamentining asosiy maqsadi — fuqarolar, tadbirkorlik subyektlari va tashkilotlarga ishonchli, tezkor va samarali qoʻriqlov xizmatlarini koʻrsatish, qoʻriqdagi obyektlarda xavfsiz muhitni taʼminlash hamda huquqbuzarliklarning barvaqt oldini olishdan iborat.
Oʻrganish yakunida Andijon viloyatida Qoʻriqlash xizmati faoliyati samaradorligini yanada oshirish, xizmat jarayonlariga innovatsion yechimlarni keng tatbiq etish, xodimlarning kasbiy mahoratini yuksaltirish va obyektlarda xavfsizlik choralarini kuchaytirish boʻyicha masʼullarga tegishli topshiriqlar berildi.