Jizzax viloyati IIB rahbariyati tomonidan hududlardagi obodonlashtirish, qurilish va ijtimoiy obyektlar faoliyati oʻrganildi
2026-06-09 10:00:00 / Yangiliklar
Jizzax viloyati IIB rahbariyati tomonidan Zarbdor va Doʻstlik tumanlaridagi ichki ishlar organlari obyektlari hamda ijtimoiy ahamiyatga ega muassasalarda amalga oshirilayotgan ishlar oʻrganildi.
Tashrif davomida Zarbdor tumani IIB maʼmuriy binosi hududida olib borilayotgan obodonlashtirish ishlari koʻzdan kechirildi.
Yashil maydonlar holati, manzarali va mevali daraxtlar, gul koʻchatlarini ekish va parvarishlash ishlari tahlil qilinib, hududning ekologik hamda estetik qiyofasini yanada yaxshilash, koʻchatlarni sifatli parvarishlash va obodonlashtirish ishlarini izchil davom ettirish boʻyicha masʼullarga tegishli koʻrsatmalar berildi.
Shuningdek, xodimlarga xizmat koʻrsatib kelayotgan “Qalqon” oshxonasidagi shart-sharoitlar hamda tuman markazidagi oziq-ovqat va dehqon bozori faoliyati oʻrganildi.
Bozorda sotuvchi va xaridorlar uchun yaratilgan qulayliklar, mahsulotlar taʼminoti, narx-navo barqarorligi, sanitariya-gigiyena talablariga rioya etilishi va oziq-ovqat mahsulotlari sifatiga alohida eʼtibor qaratildi.
IIB rahbariyati IIV “Dinamo” jismoniy tarbiya va sport jamiyati Jizzax viloyati kengashi binosida olib borilayotgan qurilish-taʼmirlash ishlarining borishi bilan ham tanishdi.
Mutasaddilar tomonidan bajarilgan ishlar va kelgusida amalga oshirilishi rejalashtirilgan loyihalar yuzasidan axborot berildi.
Obyektdan samarali foydalanish, sport infratuzilmasini takomillashtirish va xodimlar uchun zamonaviy mashgʻulot sharoitlarini yaratish masalalari muhokama qilinib, qurilish ishlarini belgilangan muddatlarda va sifat talablari asosida yakunlash boʻyicha masʼullarga aniq vazifalar yuklatildi.
Shu bilan birga, Doʻstlik tumani IIB maʼmuriy binosi atrofida amalga oshirilayotgan obodonlashtirish ishlari ham oʻrganildi. Tahlillar davomida aniqlangan ayrim kamchiliklar yuzasidan masʼullarga tegishli topshiriqlar berildi.
Tashriflar chogʻida mavsumiy dolzarb masalalar ham muhokama qilinib, gʻalla oʻrim-yigʻim jarayonlarida xavfsizlikni taʼminlash, huquqbuzarliklarning oldini olish va jamoat tartibini saqlash choralarini yanada kuchaytirish yuzasidan tegishli vazifalar belgilab berildi.
Jizzax viloyati IIB Axborot xizmati