“Jasorat uchqunlari” musobaqasining Respublika bosqichi gʻoliblari aniqlandi
2026-06-08 10:55:00 / Yangiliklar
“Jasorat uchqunlari” musobaqasining Respublika bosqichi yakunlandi.
Qarshi shahrida yoshlar oʻrtasida oʻtkazilgan “Jasorat uchqunlari” harbiy-vatanparvarlik va sport musobaqasining Respublika bosqichi tantanali ravishda yakunlandi. Musobaqaning yopilish va taqdirlash marosimida Maktabgacha va maktab taʼlimi vaziri oʻrinbosari, Qashqadaryo viloyati hokimi, hamkor tashkilotlar vakillari hamda keng jamoatchilik ishtirok etdi.
Yoshlarni harbiy-vatanparvarlik ruhida tarbiyalash, ularning jismoniy va maʼnaviy tayyorgarligini mustahkamlash maqsadida tashkil etilgan mazkur musobaqada Respublikamizning barcha hududlaridan saralangan jamoalar oʻzaro kuch sinashdilar.
Yakuniy natijalarga koʻra, faxrli I oʻrinni Xorazm viloyatining “Jaloliddin Manguberdi” jamoasi qoʻlga kiritdi.
Faxrli II oʻrin Oʻzbekiston Respublikasi IIV Qorovul qoʻshinlariga qarashli 7533 harbiy qismga biriktirilgan Qashqadaryo viloyatining “Buyuk Temur avlodlari” jamoasiga nasib etdi.
III oʻrinni esa Toshkent shahrining “Barloslar” jamoasi egalladi. Ushbu jamoa Oʻzbekiston Respublikasi IIV Qorovul qoʻshinlariga qarashli 7531 harbiy qismga biriktirilgan.
Shuningdek, musobaqa davomida turli yoʻnalishlarda yuqori natijalarni qayd etgan jamoalar maxsus nominatsiyalar bilan taqdirlandi. Gʻolib va sovrindor jamoalar, shuningdek, ularni tayyorlagan ustoz-murabbiylar diplomlar hamda qimmatbaho esdalik sovgʻalari bilan ragʻbatlantirildi.
“Jasorat uchqunlari” musobaqasi yoshlarning Vatanga sadoqat, jasorat va fidoyilik fazilatlarini mustahkamlash, ularni harbiy xizmatga tayyorlash hamda sogʻlom turmush tarzini targʻib etishda muhim ahamiyat kasb etmoqda. Mazkur loyiha yosh avlod qalbida vatanparvarlik tuygʻularini yanada kuchaytirishga xizmat qilmoqda.
Oʻzbekiston Respublikasi IIV Qorovul qoʻshinlari