O‘zbеkiston Rеspublikаsi Ichki ishlаr vаzirligi

Ichki ishlar vazirining 1-oʻrinbosari, Jamoat xavfsizligi departamenti boshligʻi general-mayor Rustam Djurayev boshchiligida bolalar sogʻlomlashtirish oromgohlarini yozgi taʼtil mavsumi boshlanishi va bolalarni qabul qilishga tayyorlash masalalariga bagʻishlangan tezkor videoselektor yigʻilishi boʻlib oʻtdi.

Yigʻilishda IIV Jamoat xavfsizligi departamenti va uning hududiy boʻlinmalaridagi huquqbuzarliklar profilaktikasi jamoat tartibini saqlash, yoʻl harakati xavfsizligi xizmatlari rahbarlari va oʻrinbosarlari, shuningdek Qoʻriqlash departamenti masʼul xodimlari hamda voyaga yetmaganlar xavfsizligini taʼminlashga masʼul boʻlgan xizmatlar xodimlari ishtirok etdi.

Vazirning 1-oʻrinbosari yozgi taʼtil davrida voyaga yetmaganlar xavfsizligini kompleks taʼminlash, sogʻlomlashtirish oromgohlarida tayyorgarlik ishlarini oʻz vaqtida yakunlash hamda joylarda profilaktik ishlarni kuchaytirish zarurligiga alohida eʼtibor qaratdi.

U bolalarni tashishda xavfsizlik qoidalariga qatʼiy rioya etish, avtobus kolonnalariga hamrohlikni toʻgʻri tashkil etish, shuningdek foydalanilayotgan transport vositalarining texnik holatini doimiy nazorat qilish muhimligini taʼkidladi.

Shuningdek, oromgohlar va ularga tutash hududlarda jamoat tartibini saqlashda idoralararo hamkorlikni kuchaytirish zarurligi alohida qayd etildi.

Shu munosabat bilan “Gʻamxoʻrlik–2026” respublika ishchi guruhi, tezkor shtab faoliyati samaradorligini oshirish boʻyicha aniq vazifalar qoʻyildi.

Joriy yilda respublika boʻyicha 180 dan ziyod statsionar sogʻlomlashtirish oromgohlarida 157 mingdan ortiq bolalarning dam olishi tashkil etilishi rejalashtirilgani qayd etildi.

Hozirgi kunda oromgohlar faoliyati bosqichma-bosqich yoʻlga qoʻyilib, 113 ta oromgoh ishga tushirilgan va ularga 19 mingga yaqin bola qabul qilingan.

Bolalarni dam olish joylariga xavfsiz yetkazish va uyushgan kolonnalarga hamrohlik qilish uchun 200 dan ortiq xizmat avtotransport vositalari hamda yoʻl-patrul xizmati shaxsiy tarkibi jalb etilgan.

Hokimliklar, yoʻl harakati xavfsizligini tashkil etish markazi va boshqa mutasaddi tashkilotlar bilan hamkorlikda oromgohlarning tayyorgarligi kompleks oʻrganilib, dam olish joylariga olib boruvchi 3 411 km dan ortiq avtomobil yoʻllari koʻrikdan oʻtkazildi. 1 297 ta yoʻl belgisi oʻrnatildi, 244 km yoʻllarda chiziqlar chizildi, 368 ta piyodalar oʻtish joyi belgilandi hamda 134 km yoʻl qismi taʼmirlandi.

Oromgohlarda va ularga tutash hududlarda jamoat tartibini taʼminlash uchun profilaktika inspektorlari, patrul-post xizmati, jamoat tartibini saqlash boʻlinmalari va FVV xodimlaridan iborat xizmatlar biriktirildi. Har kunlik vaziyatni nazorat qilish uchun masʼul xodimlar belgilandi.

Oromgohlar joylashgan hududlarda profilaktik ishlar kuchaytirildi. Videokuzatuv tizimlarini joriy etish va kameralarni markazlashtirilgan monitoring tizimiga integratsiya qilish masalasiga alohida eʼtibor qaratildi.

Yigʻilish yakunlari boʻyicha voyaga yetmaganlar oʻrtasida huquqbuzarliklarning oldini olishni yanada kuchaytirish, bolalarning xavfsiz dam olishini taʼminlash hamda idoralararo hamkorlikni mustahkamlash boʻyicha aniq topshiriqlar berildi.

IIV Jamoat xavfsizligi departamenti Axborot xizmati