IIV Akademiyasiga BMTning Inson huquqlari boʻyicha Oliy komissari boshqarmasining Markaziy Osiyo boʻyicha mintaqaviy maslahatchisi Omer Fisher tashrif buyurdi
2026-06-06 12:55:00 / Yangiliklar
Ikki tomonlama muloqot chogʻida inson huquqlari sohasidagi taʼlimni rivojlantirish, manfaatli yoʻnalishlarda hamkorlikni kengaytirish, mintaqaviy xavfsizlik va barqarorlik masalalari yuzasidan fikr almashildi.
Akademiya boshligʻi Rustam Xatamov mehmonni qutlar ekan, keyingi yillarda Oʻzbekiston va BMT oʻrtasidagi munosabatlarda yangi davr boshlanganini alohida taʼkidladi.
Koʻp qirrali hamkorlik barqaror rivojlanish sohasidagi milliy maqsadlarni amalga oshirishda muhim ahamiyat kasb etayotganini bildirdi.
Oʻz navbatida, Omer Fisher mamlakatimizda kechayotgan demokratik islohotlarni mamnuniyat bilan eʼtirof etdi.
Misli koʻrilmagan yangilanishlar inson qadri va farovonligini oshirish, jamiyatda adolat va qonun ustuvorligini mustahkamlash, Yangi Oʻzbekistonni barpo etishda mustahkam zamin yaratayotganini aytib oʻtdi.
Uchrashuvda taʼlim sohasida hamkorlikni chuqurlashtirish, qoʻshma oʻquv dasturlarini amalga oshirish, professor-oʻqituvchilar va tinglovchi-kursantlarning kasbiy salohiyatini oshirish, inson huquqlari sohasidagi Jahon taʼlim dasturining beshinchi bosqichi doirasida muhim chora-tadbirlarni belgilab olishga kelishib olindi.
Omer Fisher akademiyada yoʻlga qoʻyilgan innovatsion taʼlim jarayonlari, huquqni muhofaza qiluvchi organlar uchun yuqori malakali kadrlar tayyorlashda qoʻllanilayotgan ilgʻor yondashuvlar va oʻquv dargohining istiqbolli rejalariga yuqori baho berdi.
IIV Akademiyasi Axborot xizmati