O‘zbеkiston Rеspublikаsi Ichki ishlаr vаzirligi

“Yoshlar kuni” doirasida Toshkent shahar IIBB boshligʻi polkovnik Ravshan Sultanxodjayev Toshkent Davlat yuridik universitetida talabalar bilan ochiq muloqot oʻtkazdi.

“Rahbar va yoshlar uchrashuvi” doirasida tashkil etilgan mazkur tadbirda, shuningdek, Universitet rektori Baxshillo Xodjayev, talabalar va boshqa masʼullar ishtirok etishdi.

Soʻzga chiqqanlar yosh kadrlarni qoʻllab-quvvatlash, ichki ishlar tizimida taʼlim, amaliyot va xizmat integratsiyasi hamda yosh yuristlar uchun ichki ishlar organlarida xizmat faoliyatining zamonaviy talablari va rivojlanish bosqichlari haqida soʻz yuritdilar.

Xususan, Bosh boshqarma boshligʻi R.Sultanxodjayev yoshlarning jinoyatchilik profilaktikasi, kiberxavfsizlik, raqamli boshqaruv, jamoat xavfsizligi, aholining huquqiy ongi va kibermadaniyatini oshirish jarayonlarida faol qatnashishlari kerak ekanligi, holbuki, bugungi talabalar – ertangi tergovchi, prokuror, sudya, advokat, davlat xizmatchisi yoki ichki ishlar organlari xodimlari boʻlishlarini taʼkidladi.

Auditoriyaning asosiy qismini huquqni muhofaza qilish sohasiga qiziquvchi va shu yoʻnalishda tahsil olayotgan yoshlar tashkil etgani ularning masʼullarga bergan savollari va ilgari surgan takliflarida ham yaqqol namoyon boʻldi.

Talabalardan biri ichki ishlar idoralari faoliyati bilan yaqindan tanishish, tizimdagi jarayonlarni bevosita kuzatish istagini bildirdi. Ushbu taklifga javoban Toshkent shahar IIBB boshligʻi “Ichki ishlar idoralarida bir kun” loyihasini amalga oshirish taklifini ilgari surdi. Bu tashabbus talabalar tomonidan katta qiziqish bilan qarshi olindi.

Ichki ishlar organlarida xizmat qilish istagida boʻlgan talabalarning fikr va takliflari ham diqqat bilan tinglanib, ularning kelgusidagi kasbiy faoliyatiga oid masalalar muhokama qilindi.

Talabalar bilan oʻtkazilgan savol-javoblardan soʻng poytaxt IIBB hamda oliygoh oʻrtasida oʻzaro hamkorlik toʻgʻrisidagi Memorandum imzolandi.

R.Sultanxodjayev mazkur Memorandum orqali bilimli kadrlar tayyorlash, amaliy tajribani taʼlim bilan bogʻlash, kiberjinoyatlarning oldini olish va ularni samarali tergov qilish boʻyicha ilmiy asoslangan yondashuvlarni shakllantirish, qoʻshma tadqiqotlar, oʻquv modullari, tajriba almashinuvi, yosh kadrlarni kasbiy yoʻnaltirish va ichki ishlar organlari faoliyatini yanada takomillashtirishga xizmat qiluvchi aniq natijalar bilan boyishini qayd etib oʻtdi.

Shuningdek, Memorandum oddiy rasmiy hujjat boʻlmay, balki ichki ishlar organlari amaliyoti, yuridik taʼlim va ilm-fan oʻrtasidagi hamkorlikni yangi bosqichga olib chiquvchi muhim amaliy qadam ekanligini taʼkidlar ekan, poytaxt IIBB hamda mazkur bilim dargohi oʻrtasida hamkorlikni yoʻlga qoʻyishda tashabbus koʻrsatgan barchaga hurmat va minnatdorligini bildirdi.

Yoshlar bilan uchrashuv yana bir muhim tadbirga ulandi: uzoq yillar davomida fuqarolik olish bilan bogʻliq muammolarga duch kelayotgan ikki nafar fuqaroligi boʻlmagan shaxslarga Oʻzbekiston Respublikasi Prezidenti Farmoni asosida fuqarolik berilgani eʼlon qilinib, ularga ID-kartalari tantanali ravishda topshirildi.

Toshkent shahar IIBB Axborot xizmati