Ichki ishlar vazirligi Akademiyasi va Xitoy Jamoat xavfsizligi universiteti oʻrtasidagi aloqalar izchil rivojlanib bormoqda
2026-06-06 11:25:00 / Yangiliklar
Oʻzaro hamkorlik memorandumi doirasida akademiya professor-oʻqituvchilari va kursantlari uchun Pekin shahrida navbatdagi oʻquv kursi tashkil qilindi.
Oʻquv kursi davomida universitet professor-oʻqituvchilari tomonidan Xitoy mamlakatining ichki va tashqi siyosati, rivojlanish strategiyasi, zamonaviy politsiya tizimi, mintaqaviy xavfsizlik va barqarorlikka tahdid solayotgan omillar, jamoat xavfsizligini taʼminlash va jinoyatchilikka qarshi kurashish, xususan kiberjinoyatlarning oldini olish boʻyicha mashgʻulotlar oʻtkazildi.
Bundan tashqari, vakillarimiz Jamoat xavfsizligi universiteti, mazkur universitetning Tuanhe kampusi, Haydan huquqni muhofaza qilish markazi va Tyanszin politsiya departamentida boʻlib, amaliyotdagi ilgʻor yutuqlarni oʻrgandilar.
Ikki mamlakat yoshlari ishtirokida oʻtkazilgan madaniy-maʼrifiy tadbirlar doʻstona munosabatlarni mustahkamlash hamda milliy qadriyat va anʼanalarni targʻib qilish imkonini berdi.
Shu bilan birga, vakillarimiz kiberjinoyatchilikka qarshi kurashish muammolariga bagʻishlab Jamoat xavfsizligi universitetida oʻtkazilgan XIV Xalqaro politsiya forumida ishtirok etib, xorijiy davlatlardan kelgan mehmonlar bilan fikr almashdilar.
IIV Akademiyasi Axborot xizmati