Oʻzbekiston Respublikasi Odil sudlov akademiyasining kasbiy qayta tayyorlash kurslariga 2026/2027 oʻquv yili uchun qabul eʼlon qilinadi
2026-06-05 10:00:00 / Yangiliklar
Oʻzbekiston Respublikasi Odil sudlov akademiyasining kasbiy qayta tayyorlash kurslariga 2026/2027 oʻquv yili uchun fuqarolik, jinoyat, iqtisodiy va maʼmuriy sud ixtisosliklari boʻyicha qabul eʼlon qilinadi.
Tayyorlash kursiga oʻttiz toʻrt yoshdan kichik boʻlmagan (2026-yilning 31-dekabr kuniga qadar oʻttiz toʻrt yoshga toʻladigan), oliy yuridik maʼlumotga va yuridik ixtisosligi boʻyicha kamida yetti yillik ish stajiga ega boʻlgan Oʻzbekiston Respublikasi fuqarolari qabul qilinadi.
Sudyalik lavozimlariga nomzodlarni tayyorlash Akademiyaning olti oylik kasbiy qayta tayyorlash kurslarida davlat granti asosida sud ixtisosliklari boʻyicha tashkil etiladi.
Qayta tayyorlash kursiga kirishda talabgorlar quyidagi hujjatlarni taqdim etishlari lozim:
– Qayta tayyorlash kursi ixtisosligi yoʻnalishini hamda test topshiradigan xorijiy tilni koʻrsatgan holda Akademiya rektori nomiga ariza;
- shaxsni tasdiqlovchi hujjat (pasport yoki ID shaxs guvohnomasi) nusxasi;
– maʼlumotnoma-obyektivka (yozma va elektron shaklda);
– tayanch oliy yuridik maʼlumot toʻgʻrisidagi bakalavr diplomi (taʼlim yoʻnalishi: yurisprudensiya; taʼlim shifri: 5240100 yoki 5380100) va ilovasining asli va nusxasi yoki tashkilotning kadrlar boʻlimida tasdiqlangan nusxalari, agar diplom tan olingan (nostrifikatsiya qilingan) boʻlsa, bu haqdagi hujjat nusxasi (bunda diplomning asli nusxasi bilan solishtirilib, egasiga qaytariladi);
– mehnat daftarchasining notarial tasdiqlangan yoki tashkilotning kadrlar boʻlimida tasdiqlangan nusxasi yoki my.gov.uz interaktiv xizmatlari orqali olingan va maxsus kod (QR-kod) mavjud boʻlgan elektron nusxasi;
– Oʻzbekiston Respublikasi Sudyalar oliy kengashining 2026-yil
19-fevraldagi 2108-sonli qarori bilan tasdiqlangan shakldagi tibbiy xulosa (086-1 shakl).
Talabgorlardan ariza va hujjatlar 2026-yil 16-may soat 09:00 dan 5-iyun soat 18:00 ga qadar qabul qilinadi.
Ariza va hujjatlar viloyat va unga tenglashtirilgan sudlar sudyalari malaka hayʼatlari yoki bevosita Qabul komissiyasiga talabgor tomonidan yozma shaklda taqdim etilishi mumkin.
Maʼlumot uchun tel: (998) 55-501-02-40.
Manzil: Toshkent shahar, Chilonzor tumani, Choʻponota koʻchasi, 6-uy.
Qabul komissiyasi