Huquqni muhofaza qiluvchi organ xodimlari oʻrtasida “Dinamo” jismoniy tarbiya sport jamiyati tomonidan oʻtkazilgan XXXV Spartakiada dasturidagi futbol musobaqasi oʻz yakuniga yetdi
2026-06-03 23:35:00 / Yangiliklar
Toshkent shahridagi IIVga qarashli JAR stadionida boʻlib oʻtgan hal qiluvchi oʻyinlar yuqori shiddat, keskin raqobat va sportga xos haqiqiy murosasiz kurash ruhida oʻtdi. Bellashuvlar davomida jamoalarning gʻalabaga boʻlgan intilishi, jismoniy tayyorgarligi va jamoaviy uygʻunligi yaqqol namoyon boʻldi.
Final bahsida Ichki ishlar vazirligi hamda DXX jamoalari chempionlik uchun maydonga tushdi. Tomoshabinlar uchun qiziqarli va keskin vaziyatlarga boy kechgan uchrashuvning asosiy vaqtida durrang qayd etildi va chempion nomi penaltilar seriyasida aniqlandi Yakunda Ichki ishlar vazirligi jamoasi 1-oʻrinni qoʻlga kiritib, XXXV Spartakiada dasturi boʻyicha futbol musobaqasining mutlaq gʻolibi sifatida eʼtirof etildi.
Mazkur Spartakiada nafaqat sport musobaqasi, balki huquqni muhofaza qiluvchi organlar xodimlarining jismoniy tayyorgarligi, iroda kuchi va jamoaviy hamjihatligini namoyon etuvchi muhim tadbir sifatida alohida ahamiyat kasb etdi.
Gʻolib va sovrindorlar munosib taqdirlanib, ishtirokchilarga kelgusidagi musobaqalarda yanada ulkan muvaffaqiyatlar tilandi.