Ichki ishlar vazirligida xizmat faoliyati samaradorligini oshirish, huquqbuzarliklar profilaktikasini kuchaytirish hamda kiberxavfsizlik masalalariga bagʻishlangan videoselektor yigʻilishi oʻtkazildi
2026-06-04 10:00:00 / Yangiliklar
Ichki ishlar vaziri general-leytenant Aziz Tashpulatov tomonidan vazirlik sohaviy xizmatlari, hududiy boʻlinmalar rahbarlari va shaxsiy tarkibi ishtirokida videoselektor yigʻilishi oʻtkazildi.
Tadbirda mamlakatimizda jamoat xavfsizligini taʼminlash, huquqbuzarliklarni oldini olish, aholi osoyishtaligini mustahkamlash borasida amalga oshirilayotgan ishlar tanqidiy-tahliliy muhokama qilindi.
Xususan, mahallalarda xavfsiz muhit yaratish, kriminogen vaziyatni barqaror saqlash hamda huquqbuzarliklar profilaktikasini yangi bosqichga olib chiqish masalalariga alohida eʼtibor qaratildi. Shu bilan birga, profilaktik hisobda turgan shaxslar bilan yakka tartibda ishlash, ijtimoiy profilaktika choralarini kuchaytirish va jinoyatlarning barvaqt oldini olish boʻyicha aniq vazifalar belgilab berildi.
Yigʻilishda, shuningdek yoʻl harakati xavfsizligini taʼminlash, yoʻl-transport hodisalarining oldini olish va fuqarolar xavfsizligini taʼminlash borasidagi ishlar ham tahlil qilindi.
Kiberxavfsizlikni taʼminlash va axborot texnologiyalari yordamida sodir etilayotgan jinoyatlarning oldini olish maqsadida aholi oʻrtasida raqamli madaniyatni yuksaltirish, internet tarmogʻidan xavfsiz foydalanish qoidalarini keng targʻib qilish masalalariga alohida ahamiyat qaratildi. Masʼullarga kiberjinoyatlarga qarshi kurashish, zamonaviy tahlil va monitoring tizimlarini takomillashtirish, profilaktik tadbirlarni kuchaytirish hamda aholini ogohlantirish ishlarini jadallashtirish boʻyicha aniq vazifalar qoʻyildi.
Yigʻilish kun tartibida aholi murojaatlari bilan ishlash masalalari muhim oʻrin egalladi. Jarayonda fuqarolar tomonidan kelib tushayotgan ariza va shikoyatlarni har tomonlama oʻrganish, ularning muammolariga qonuniy va adolatli yechim topish, fuqarolar bilan muloqot samaradorligini oshirish yuzasidan tegishli koʻrsatmalar berildi.
Tadbir davomida Qoʻriqlash xizmati faoliyatini takomillashtirish, xonadonlar va turli obyektlarni qoʻriqlovga jalb qilish koʻlamini kengaytirish, sohada raqamlashtirish jarayonlarini jadallashtirish, innovatsion texnologiyalar va zamonaviy loyihalarni amaliyotga tatbiq etish masalalari ham kun tartibidan oʻrin oldi.
Muhokamalar davomida xizmat faoliyatida yoʻl qoʻyilayotgan kamchiliklar tanqidiy koʻrib chiqilib, belgilangan vazifalar ijrosini taʼminlash borasida masʼul rahbar va xodimlarning shaxsiy masʼuliyati kuchaytirilishi taʼkidlandi.
Yigʻilish yakunida xizmat intizomi va ijro samaradorligini oshirish boʻyicha qatʼiy talablar belgilandi. Xizmat vazifalarini bajarishda sustkashlikka yoʻl qoʻygan hamda kamchiliklarga sabab boʻlgan ayrim xodimlarga nisbatan intizomiy jazo choralari qoʻllanildi.
Tezkor yigʻilishda belgilangan vazifalar ijrosini taʼminlash, aholi xavfsizligini yanada mustahkamlash va ichki ishlar organlari faoliyati samaradorligini oshirish boʻyicha aniq topshiriqlar berildi.