IIV akademiyasiga AQShdagi Xalqaro Turon federatsiyasi (International Turon Federation) vakillari tashrif buyurdi
2026-06-03 19:45:00 / Yangiliklar
Xalqaro Turon federatsiyasiga 2025-yil 15-iyulda asos solingan. Uning bosh qarorgohi dunyoning eng yirik siyosiy, moliyaviy va madaniy markazlaridan biri boʻlgan Nyu-York shahrida joylashgan. Turon oʻzbek milliy yakkakurashini rivojlantirish va dunyo boʻylab ommalashtirish tashkilotning asosiy maqsadi sanaladi.
Tashrif chogʻida federatsiya prezidenti Farrux Niyazimbetovga tashkilot boshqaruv organi vakillari, yurtimiz va jahonning boshqa mintaqalaridagi federatsiyalar mutasaddilari hamrohlik qildi. Mehmonlar dastlab akademiya faoliyati, maskanda yoʻlga qoʻyilgan ilgʻor yondashuvlar bilan yaqindan tanishdilar. Jangovar va jismoniy tayyorgarlik kafedrasida yaratilgan zamonaviy sharoitlarni koʻzdan kechirdilar. Shu yerning oʻzida Oʻzbekiston Turon yakkakurashi federatsiyasi aʼzolari tomonidan koʻrgazmali chiqishlar namoyish qilindi.
Shundan soʻng akademiya boshligʻi Rustam Xatamov mehmonlarni qabul qildi. Muloqotda ikki tomonlama aloqalarni yoʻlga qoʻyish, oʻzbek milliy yakkakurashini ommalashtirish, mahoratli sportchilar va murabbiylarni tayyorlash, ularni xalqaro arenalarga olib chiqish, mazkur yoʻnalishda milliy va xalqaro tajribalarni oʻrganish borasida fikr almashildi.
Federatsiya prezidenti F. Niyazimbetov Turon yakkakurashi koʻp asrlik tarix va milliy anʼanalarni oʻzida mujassam etgani, keyingi yillarda uni rivojlantirish boʻyicha salmoqli saʼy-harakatlar amalga oshirilgani, xususan, koʻplab davlatlarda milliy federatsiyalarga asos solinib, Osiyo Turon yakkakurashi assotsiatsiyasi tashkil etilganini taʼkidladi.
Yurtimiz yoshlari oʻrtasida milliy sport turimizga eʼtiborning kuchayishi yangi iqtidor egalarini kashf etish, ichki ishlar organlari xodimlarining jangovar-jismoniy tayyorgarligini oshirish barobarida, Oʻzbekistonning jahondagi nufuzini yanada yuksaltirishga xizmat qilishini eʼtirof etdi.
Oʻz navbatida, akademiya boshligʻi sport har bir mamlakatni dunyoga tanitadigan muhim sohalardan biri ekanligini, muhtaram Prezidentimiz rahbarligida olib borilayotgan keng qamrovli islohotlar samarasida mamlakatimizda sportning barcha yoʻnalishlari izchil rivojlanib borayotgani, oʻquv dargohida Turon yakkakurashi bilan shugʻullanish istagida boʻlgan yoshlar uchun barcha imkoniyatlar mavjudligini alohida qayd etdi.
Uchrashuv davomida tomonlar hamkorlikning huquqiy asoslarini mustahkamlash, yangi sport seksiyalarini tashkil etish, yoshlarni ushbu sport turiga keng jalb qilish, kelgusida turli darajadagi nufuzli musobaqalarni oʻtkazishga kelishib oldilar.
IIV akademiyasi Axborot xizmati