Mustaqilligimizning oʻttiz besh yilligi arafasida Qoraqalpogʻiston Respublikasi Ichki ishlar vazirligining yangi binosi foydalanishga topshirildi
2026-06-02 17:00:00 / Yangiliklar
Zamonaviy sharoitlar va qulay xizmat muhiti har bir xodimning ish samaradorligini oshirishga katta hissa qoʻshadi. Nukus shahri markaziga bezak boʻlib turgan Qoraqalpogʻiston Respublikasi ichki ishlar vazirligining yangi binosi ham soha vakillarini yangi maqsad va yangi marralar sari chorlashga shay holga keltirildi.
Binoning tantanali ochilish marosimida Oʻzbekiston Respublikasi ichki ishlar vaziri general-leytenant Aziz Tashpulatov, Qoraqalpogʻiston Respublikasi Joʻqorgʻi Kengesi raisi Amanbay Oʻrinboyev, barcha huquqni muhofaza qilish organlari rahbarlari, jamoatchilik vakillari, faxriylar hamda shaxsiy tarkib ishtirok etdi.
Davlatimiz rahbari tomonidan ichki ishlar organlari tizimini yanada rivojlantirish maqsadida yaratilayotgan sharoitlarning uzviy davomi sifatida bunyod etilgan ushbu bino mustaqilligimizning 35-yilligi arafasida chinakam sovgʻa boʻlganligi eʼtirof etildi.
Shundan soʻng faxriylar tomonidan ramziy lentalar qirqilib, tadbir ishtirokchilari yaratilgan sharoitlar bilan yaqindan tanishishdi.
Umumiy olti qavatdan iborat, zamonaviy yechimlar bilan barpo etilgan binoning dastlabki qavatida navbatchilik qismi joylashgan boʻlib, unda maʼlumot almashinuvi hamda kuch-vositalarni boshqarishda raqamlashtirilgan tizim qoʻllanilmoqda.
Xodimlarning xizmat xonalarida ham barcha qulayliklar yaratilib, zaruriy texnik vositalar bilan toʻliq taʼminlangan.
Eʼtiborli jihati, badiiy va ilmiy asarlar bilan toʻldirilgan kutubxona hamda goʻzal manzaralar bilan boyitilgan vatanparvarlik burchagi ham tashkil qilingan boʻlib, bu albatta shaxsiy tarkibning maʼnaviy dunyoqarashini yanada rivojlantirishga xizmat qiladi.
Ichki ishlar vaziri tomonidan aholi murojaatlari bilan ishlash, tashrif buyuruvchi fuqarolar uchun qulayliklar yaratish hamda xodimlarning jismoniy va jangovar tayyorgarligi, muomala madaniyatini yanada yuksaltirish boʻyicha qoʻshimcha mashgʻulotlar oʻtkazish borasida masʼullarga tegishli koʻrsatmalar berildi.
Tadbir davomida shuningdek, Qoraqalpogʻiston Respublikasi Ichki ishlar vazirligi xodimlari uchun yangi xizmat avtomobillari va zirhlangan texnikalar topshirildi.
Bu kabi bunyodkorliklar, zamonaviy imkoniyatlar, qulay sharoitlar albatta jinoyatchilikni barvaqt oldini olish, aholi osudaligini taʼminlash yoʻlida xizmat qilayotgan xodimlarning faoliyatida kuch va shijoat bagʻishlaydi.