Mehr va eʼtibor markazida boʻlgan bolalar: IIV tomonidan Boʻstonliqda “Bolajonlar sayli” tashkil etildi
2026-06-02 09:00:00 / Yangiliklar
1-iyun — Xalqaro bolalarni himoya qilish kuni munosabati bilan Ichki ishlar vazirligi tashabbusi hamda hamkor tashkilotlar ishtirokida saraton va oqqon kasalligi bilan davolanayotgan bolalar, shuningdek, xizmat vazifasini bajarish vaqtida fojiali vafot etgan xodimlarning farzandlari uchun “Bolajonlar sayli” tashkil etildi.
Boʻstonliq tumanida oʻtkazilgan tadbirda jami 50 nafarga yaqin bolalar ishtirok etdi. Jumladan, 20 nafar oqqon va saraton kasalligi bilan davolanayotgan bolalar hamda xizmat burchini bajarish vaqtida halok boʻlgan xodimlarning farzandlari uchun mazmunli dam olish va koʻngilochar dasturlar tashkil qilindi.
Tadbirda IIV Maʼnaviy-maʼrifiy ishlar va kadrlar bilan taʼminlash departamenti boshligʻi oʻrinbosari, podpolkovnik Saxipjamal Djoldasova, masʼul rahbarlar, professional bokschi Isroil Madrimov hamda “Sen kuchlisan” nodavlat notijorat tashkiloti rahbari Marjona Nurmuhammedova ishtirok etdi.
Dastur doirasida bolajonlar Boʻstonliq tumanidagi “Chinorkent” dam olish maskani, “Oqtosh” bolalar oromgohi hamda Toshkent viloyati IIBB Xavfsiz turizmni taʼminlash boshqarmasida boʻlib, ular uchun turli koʻngilochar tadbirlar, konsert dasturlari tashkil etildi.
Shuningdek, bolalar uchun maxsus texnikalar koʻrgazmasi, koʻrgazmali chiqishlar hamda ijodiy uchrashuvlar oʻtkazilib, ularga esdalik sovgʻalari topshirildi.
Tadbir davomida bolajonlarning mazmunli hordiq chiqarishi, ularga eʼtibor va mehr ulashish, qalbida unutilmas taassurot qoldirishga alohida eʼtibor qaratildi.