IIV Akademiyasida yakuniy davlat attestatsiyasini tashkil etishga bagʻishlangan yigʻilish boʻlib oʻtdi
2026-06-02 09:00:00 / Yangiliklar
Unda oʻquv muassasasi rahbariyati, imtihonlarga jalb qilingan mutaxassislar, professor-oʻqituvchilar, shuningdek kunduzgi va sirtqi taʼlim yoʻnalishini tamomlayotgan kursant hamda tinglovchilar ishtirok etdi.
Yigʻilish avvalida akademiya boshligʻining birinchi oʻrinbosari, polkovnik Baxtiyor Rajabov soʻzga chiqib, ichki ishlar organlari uchun yuqori malakali kadrlar tayyorlashga qaratilgan izchil islohotlar, keyingi yillarda oʻquv jarayoniga joriy qilingan ilgʻor yondashuvlar, bitiruvchilarga qoʻyilayotgan dolzarb talablar va kelgusidagi ustuvor vazifalarga toʻxtaldi.
Shundan soʻng yakuniy davlat attestatsiyasiga oid buyruqlar oʻqib eshittirildi. Masʼullar, komissiya raislari va aʼzolariga imtihonlarni qabul qilish, bitiruv malakaviy ishi himoyalarini yuqori saviyada oʻtkazish, bitiruvchilar bilimini xolisona baholash boʻyicha belgilangan mezonlar yetkazildi.
Aytish joizki, joriy oʻquv yili yakunida kunduzgi taʼlimni “tezkor qidiruv faoliyati”, “huquqbuzarliklar profilaktikasi faoliyati”, “ekspert-kriminalistika faoliyati”, “xizmat faoliyatini tarbiyaviy-psixologik taʼminlash”, “tashkiliy-shtab faoliyati”, “jazoni ijro etish faoliyati”, “probatsiya faoliyati”, sirtqi taʼlimni esa “huquqbuzarliklarni oldini olish va fosh etish” yoʻnalishlari boʻyicha bitiruvchilar tamomlaydi.
Bitiruv malakaviy ishi himoyalari va imtihonlar 19-iyunga qadar boʻlib oʻtadi.
IIV Akademiyasi Axborot xizmati