Buxoro viloyati Kogon tumanida gʻalla oʻrimini xavfsiz va uyushqoqlik bilan oʻtkazishga bagʻishlangan yigʻilish boʻlib oʻtdi
2026-05-31 14:00:00 / Yangiliklar
Buxoro viloyati ichki ishlar boshqarmasi boshligʻi hamda Kogon tumani hokimligi masʼullari ishtirokida gʻalla oʻrim-yigʻimi mavsumini betalofat oʻtkazish masalalariga bagʻishlangan kengaytirilgan yigʻilish oʻtkazildi. Unda hududdagi huquq-tartibot idoralari xodimlari va gʻallakor fermer xoʻjaliklari rahbarlari qatnashdi.
Yigʻilishda el rizqi boʻlgan don hosilini qisqa muddatlarda sifatli va nest-nobud qilmasdan oʻrib-yigʻib olish asosiy vazifa ekanligi taʼkidlandi. Buning uchun qishloq xoʻjaligi texnikalarining toʻliq shayligini taʼminlash hamda yuk avtomobillarining yoʻl harakati qoidalariga qatʼiy rioya etgan holda bexatar harakatlanishini nazorat qilish boʻyicha aniq vazifalar belgilandi.
Tadbirda viloyat ichki ishlar boshqarmasi rahbariyati tomonidan mavsum davomida jamoat tartibini saqlash, yongʻin xavfsizligini taʼminlash hamda hosilning talon-toroj qilinishining qatʼiy oldini olish masalalariga alohida eʼtibor qaratildi. Yetishtirilgan hosilni tashish, saqlash va topshirish jarayonlarida ichki ishlar organlari tomonidan uzluksiz nazorat oʻrnatilishi qayd etilib, yakunda mavsumni betalafot oʻtkazish yuzasidan barcha zaruriy chora-tadbirlar kelishib olindi.
Buxoro viloyati IIB Axborot xizmati