Ichki ishlar vaziri Toshkent viloyatida turistik mavsumda hamda bolalar oromgohlarida xavfsizlikni taʼminlash boʻyicha olib borilayotgan ishlar bilan tanishdi
2026-05-30 20:00:00 / Yangiliklar
Ichki ishlar vaziri general-leytenant Aziz Tashpulatov Toshkent viloyati hududida turistik mavsumda fuqarolar va sayyohlar xavfsizligini taʼminlash, bolalarning yozgi dam olishini xavfsiz tashkil etish boʻyicha amalga oshirilayotgan ishlar yuzasidan oʻrganishlar olib bordi.
Amaliy oʻrganishlar davomida dam olish maskanlari va turistik hududlarda mahalliy aholi hamda xorijiy sayyohlar xavfsizligini taʼminlash, jamoat tartibini saqlash va huquqbuzarliklarning oldini olish borasida amalga oshirilayotgan chora-tadbirlar koʻrib chiqildi.
Shuningdek, Toshkent viloyati IIBB Xavfsiz turizmni taʼminlash boshqarmasining Suv obyektlarida xavfsizlikni taʼminlash boʻlinmasi faoliyati oʻrganilib, boʻlinma tasarrufiga yangi topshirilgan maxsus kater va gidroskuterlarning texnik imkoniyatlari bilan tanishildi.
Biriktirilgan maxsus texnika vositalaridan xizmat faoliyatida samarali foydalanish boʻyicha masʼullarga tegishli vazifalar yuklatildi.
Tadbir jarayonida, Ichki ishlar vazirligiga biriktirilgan Boʻstonliq tumanidagi “Chimyon” bolalar sogʻlomlashtirish oromgohining yangi mavsumga tayyorgarlik holati oʻrganildi.
Jarayonda yozgi taʼtil mavsumida bolalarning oromgohlarda xavfsiz va mazmunli dam olishini tashkil etish masalalari muhokama qilindi.
Oʻrganishlar davomida masʼullarga, bolalarning xavfsizligi va salomatligini taʼminlash, dam olish jarayonini yuqori saviyada tashkil etish hamda oromgoh faoliyatini yanada takomillashtirish yuzasidan tegishli vazifalar yuklatilib, ijrosi nazoratga olindi.