Jizzax viloyati IIB rahbariyati tomonidan turistik maskanlarda xavfsizlik holati oʻrganildi
2026-05-30 09:00:00 / Yangiliklar
Jizzax viloyati IIB rahbariyati tomonidan viloyat hududidagi turistik va dam olish maskanlarida fuqarolar hamda sayyohlar xavfsizligini taʼminlash, jamoat tartibini saqlash va huquqbuzarliklarning oldini olish borasida amalga oshirilayotgan ishlar oʻrganildi.
Xususan, Forish tumanida joylashgan “Baland osmon” MCHJ hamda Sharof Rashidov tumanidagi “Rancho tur” MCHJga qarashli turistik maskanlarga tashrif buyurilib, bu yerlarda mahalliy va xorijiy sayyohlar uchun yaratilgan shart-sharoitlar, xavfsizlik tizimi, videokuzatuv vositalari hamda profilaktik tadbirlarning tashkil etilishi koʻzdan kechirildi.
Oʻrganishlar jarayonida masʼullar tomonidan sayyohlarning xavfsiz, mazmunli va maroqli dam olishini taʼminlash, ularga sifatli xizmat koʻrsatish hamda hududlarda barqaror jamoat tartibini saqlash borasida amalga oshirilayotgan ishlar haqida axborot berildi.
Shuningdek, turistik mavsum davomida xavfsizlik choralarini yanada kuchaytirish, jamoat xavfsizligini taʼminlash tizimini takomillashtirish, xizmat koʻrsatish madaniyatini yuksaltirish hamda huquqbuzarlik va koʻngilsiz holatlarning barvaqt oldini olishga qaratilgan profilaktik tadbirlar samaradorligini oshirish boʻyicha tegishli masʼullarga aniq vazifa va topshiriqlar berildi.
Taʼkidlanganidek, turistik maskanlarda xavfsiz muhitni yaratish, sayyohlar huquq va manfaatlarini ishonchli himoya qilish hamda hududning turistik jozibadorligini oshirish ichki ishlar organlarining ustuvor vazifalaridan biri hisoblanadi.
Jizzax viloyati IIB Axborot xizmati