IIV Malaka oshirish institutida KOICA loyihasi doirasida ilmiy tadqiqot natijalari boʻyicha oraliq hisobot tinglandi
2026-05-30 09:00:00 / Yangiliklar
Oʻzbekiston Respublikasi Ichki ishlar vazirligi Malaka oshirish institutida Koreya xalqaro hamkorlik agentligi (KOICA)ning “Oʻzbekiston Respublikasi Ichki ishlar vazirligi Malaka oshirish institutida simulyatsiyalashtirilgan oʻquv markazini tashkil etish boʻyicha salohiyatni oshirish” loyihasi doirasida Koreya Respublikasidan tashrif buyurgan, professor Park Jae-Poong rahbarligidagi delegatsiya tomonidan ichki ishlar organlari xodimlarini tayyorlash tizimini yanada takomillashtirishga qaratilgan bosh reja yuzasidan amalga oshirilgan ilmiy tadqiqotlar natijalari boʻyicha oraliq hisobot taqdim etildi.
Tadbirda institut rahbariyati, sohaviy mutaxassislar hamda loyiha ishtirokchilari qatnashib, taqdim etilgan hisobot doirasida ichki ishlar organlari xodimlarini kasbiy tayyorlashning zamonaviy yondashuvlari, simulyatsiyalashtirilgan oʻquv muhitini joriy etish istiqbollari va mazkur bosh rejaning asosiy yoʻnalishlari yuzasidan atroflicha fikr almashdilar.
Uchrashuv davomida bosh rejani yanada takomillashtirish, uning amaliy samaradorligini oshirish hamda loyihaning keyingi bosqichlarini samarali tashkil etish masalalari boʻyicha mutaxassislar ishtirokida muhokamalar oʻtkazildi va tegishli taklif hamda tavsiyalar bildirildi.
Shuningdek, Koreya delegatsiyasi aʼzolari institutda tashkil etilgan navbatdagi bitiruvchilarni taqdirlashga bagʻishlangan tantanali tadbirda ishtirok etib, taʼlim jarayoni va tinglovchilar uchun yaratilgan shart-sharoitlar bilan yaqindan tanishdilar.
Mazkur hamkorlik loyihasi ichki ishlar organlari xodimlarini tayyorlash tizimiga ilgʻor xorijiy tajribalarni joriy etish, taʼlim jarayonining samaradorligini oshirish hamda simulyatsiyalashtirilgan oʻquv texnologiyalaridan foydalanish imkoniyatlarini kengaytirishga xizmat qilmoqda.
IIV Malaka oshirish instituti