Qashqadaryoda bolalar oromgohlari va ichki ishlar organlarida yaratilgan sharoitlar oʻrganildi
2026-05-29 22:45:00 / Yangiliklar
Yozgi taʼtil davrida bolalarning xavfsiz va mazmunli dam olishini taʼminlash, shuningdek ichki ishlar organlari faoliyati samaradorligini yanada oshirish maqsadida hududlarda oʻrganish ishlari olib borilmoqda.
Jumladan, Ichki ishlar vaziri oʻrinbosari polkovnik Diyorbek Sattarov tomonidan Qashqadaryo viloyati IIB tasarrufidagi “Guliston” bolalar oromgohida mavsum oldidan yaratilgan shart-sharoitlar oʻrganildi.
Oʻrganish davomida oromgohning yotoqxonalari, oshxonasi, tibbiyot xonasi, sport va madaniy tadbirlar maydonlari koʻzdan kechirilib, bolalar xavfsizligini taʼminlash, sanitariya-gigiyena talablariga qatʼiy rioya etish, yongʻin xavfsizligi choralarini kuchaytirish hamda bolalarning boʻsh vaqtlarini mazmunli tashkil etish masalalariga alohida eʼtibor qaratildi.
Shuningdek, Shahrisabz shahar IIB maʼmuriy binosida yaratilgan shart-sharoitlar ham oʻrganildi. Tashrif davomida fuqarolar murojaatlari bilan ishlashga moʻljallangan front-ofis, navbatchilik qismi, faollar zali, sport mashgʻulotlari xonasi, kutubxona va boshqa xizmat xonalari koʻzdan kechirildi.
Bundan tashqari, masʼullarning Shahrisabz shahrida joriy yilning oʻtgan davri mobaynida jinoyatchilikning barvaqt oldini olish, huquqbuzarliklar profilaktikasi, jamoat xavfsizligini taʼminlash hamda aholi bilan manzilli ishlash borasida amalga oshirilgan ishlar yuzasidan taqdimoti muhokama qilindi.
Yakunda tizim faoliyatini yanada takomillashtirish, aholiga xizmat koʻrsatish sifatini oshirish hamda mavjud sharoitlardan samarali foydalanish yuzasidan tegishli koʻrsatma va topshiriqlar berildi.