Samarqand viloyati ichki ishlar organlari probatsiya boʻlinmalari faoliyati oʻrganildi
2026-05-29 09:45:00 / Yangiliklar
Oʻzbekiston Respublikasi Ichki ishlar vazirligi Jamoat xavfsizligi departamenti boshligʻi oʻrinbosari – Probatsiya boshqarmasi boshligʻi Samarqand viloyatida boʻlib, hududiy probatsiya boʻlinmalari faoliyatini atroflicha oʻrgandi.
Tashrif davomida xodimlar uchun yaratilgan ish sharoitlari, probatsiya nazorati ostidagi shaxslar bilan olib borilayotgan profilaktik ishlar samaradorligi va ularning ijtimoiy moslashuvini taʼminlashga qaratilgan chora-tadbirlar bilan yaqindan tanishildi.
Jumladan, viloyatning Paxtachi, Narpay, Kattaqoʻrgʻon, Ishtixon, Oqdaryo va Urgut tumanlari, shuningdek, Kattaqoʻrgʻon shahar ichki ishlar boʻlimlari probatsiya boʻlinmalari faoliyati oʻrganildi. Hududlarda probatsiya nazorati ostidagi shaxslar tomonidan qayta jinoyat sodir etilishining oldini olish, huquqbuzarliklarni barvaqt bartaraf etish, ularning bandligini taʼminlash va jamiyatga moslashuviga koʻmaklashish borasida amalga oshirilayotgan ishlar tahlil qilindi.
Shu bilan birga, sohani raqamlashtirish, zamonaviy axborot texnologiyalarini joriy etish orqali nazorat samaradorligini oshirishga qaratilgan ishlar ham koʻrib chiqildi. Oʻrganishlar davomida aniqlangan kamchiliklar yuzasidan masʼul xodimlarga aniq topshiriqlar berildi va ularni bartaraf etish boʻyicha amaliy choralar belgilab olindi.
Tashrif doirasida probatsiya nazoratida turgan yoshlar hamda afv etilgan shaxslar bilan uchrashuvlar oʻtkazilib, ularning muammolari tinglandi. Muammoli masalalarni hal etish, ularni qoʻllab-quvvatlash va hayotda oʻz oʻrnini topishiga koʻmaklashish boʻyicha tegishli mutasaddilarga vazifalar yuklatildi.
Bunday oʻrganish ishlari respublika hududlari boʻylab izchil davom ettirilmoqda.
IIV Jamoat xavfsizligi departamenti Axborot xizmati